រសៀលថ្ងៃសុក្រ ១០កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ២៦ ខែមករា ឆ្នាំ២០១៨ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញចូលរួម និងឡើងទទួលពានរង្វាន់ជ័យលាភីឡាបិលក្រុងបាត់ដំបង ជាទីក្រុងទេសចរណ៍ស្អាតអាស៊ាន នាឱកាសវេទិកាទេសចរណ៍អាស៊ាន២០១៨ នៅសណ្ឋាគារ Shangri-La Hotel, Chiang Mai នៅខេត្តឈៀងម៉ៃ ព្រះរាជាណាចក្រថៃ ។ ក្នុងវេទិកាទេសចរណ៍អាស៊ាន២០១៨នេះ ក៏មានកិច្ចប្រជុំផ្សេងៗទៀតជាច្រើន ចាប់ពីថ្ងៃទី ២២ ដល់២៦ ខែមករា ឆ្នាំ២០១៨ ដែលមានជាអាទិ៍ កម្មវធីជួបប្រជុំសមាគមឧស្សាហកម្មទេសចរណ៍អាស៊ាន ការប្រគល់រង្វាន់ទីក្រុងទេសចរណ៍ស្អាតអាស៊ាន រង្វាន់សណ្ឋាគារបៃតងអាស៊ាន រង្វាន់ ASEAN MICE Venue Standard និងរង្វាន់និរន្តរភាពទេសចរណ៍អាស៊ាន ដល់ប្រទេសសមាជិកអាស៊ាន និងកម្មវិធីពិព័រណ៍ទេសចរណ៍អាស៊ាន (TRAVEX) ដែលមានការចូលរួមពីសំណាក់ប្រត្តិបត្តិករទេសចរណ៍អាស៊ានជាអ្នកលក់ (Sellers) និងអ្នកទិញ (Buyers) ពីក្នងតំបន់ និងពិភពលោកផងដែរ។ សម្រាប់ព្រះរាជាណាចក្រកម្ពុជា ខេត្ត-ក្រុងដែលទទួលបានពានរង្វាន់រួមមាន ពានរង្វាន់ ទីក្រុងទេសចរណ៍ស្អាតអាស៊ាន (Asean Clean Tourist City ) មានក្រុងបាត់ដំបង ក្រុងសៀមរាប និងក្រុងកែប ពានរង្វាន់សណ្ឋាគារបៃតងអាស៊ាន ទទួលបាន៥ សណ្ឋាគារ (Asean Clean Hotel Award ) ពានរង្វាន់ Asean Mice Venue Standard ៥កន្លែង ពានរង្វាន់និរន្តរភាពទេសចរណ៍អាស៊ាន (Asean Tourist Sustainable award )មានរាជធានីភ្នំពេញ និងខេត្តកែប ។
ប្រភពព័ត៌មាន: រដ្ឋបាលខេត្តបាត់ដំបង (ថ្ងៃទី២៧ ខែមករា ឆ្នាំ២០១៨)