បន្ទាយមានជ័យ៖ នាព្រឹកថ្ងៃពុធ ទី០៤ ខែមីនា ឆ្នាំ២០២០ លោក គឹង វណ្ណៈ អភិបាលរង នៃគណៈអភិបាលខេត្តបន្ទាយមានជ័យ អញ្ជើញជាអធិបតីក្នុងពិធីអបអរសាទរខួបលើកទី១០៩ ទិវាអន្តរជាតិនារី ៨មីនា ឆ្នាំ២០២០ ក្រោមប្រធានបទ "លើកកម្ពស់ការផ្តល់សេវា ដោយគ្មានការរើសអើង" នៅសាលាស្រុកអូរជ្រៅ ខេត្តបន្ទាយមានជ័យ។
ចលនានារីអន្តរជាតិ ប្រកបដោយភាពអត់ធ្មត់ពុះពាររាល់ការលំបាកគ្រប់បែបយ៉ាង កាលពីជាង១០០ ឆ្នាំមុន ពិតជាបានចូលរួមចំណែកយ៉ាងសកម្ម ក្នុងការលើកកម្ពស់ជីវភាព ឋានៈ តួនាទី របស់ស្ត្រីនៅគ្រប់ទិសទី ជាចលនាតស៊ូ គួរឲ្យគោរព និងកោតសរសើរក្រៃលេង ហើយក៏បានរួមចំណែកយ៉ាងសំខាន់ក្នុងការកាត់បន្ថយអំពើហិង្សា ការរើសអើង ប្រឆាំងនឹងនារីភេទ និងឈានដល់ការលើកកម្ពស់សមភាពយេនឌ័រ សមធម៌សង្គម និងបរិយប័ន្ន វឌ្ឍនភាព និងសន្តិភាពពិតប្រាកដដែលមនុស្សគ្រប់រូបប្រាថ្នាចង់បាន។
មានប្រសាសន៍នាឱកាសនោះ លោក គឹង វណ្ណ: អភិបាលនៃគណៈអភិបាលរង ខេត្តបន្ទាយមានជ័យ ក៏បានលេីកឡេីងថា ៖ ស្រ្តី គឺជាមាតាពិភពលោក ដែលបានចូលរួមចំណែកយ៉ាងសំខាន់ លេីកិច្ចការងារកសាងប្រទេសជាតិមាតុភូមិ។ ស្រ្តី គឺជាកម្លាំងដែលមិនអាចខ្វះខាតបានក្នុងកិច្ចការងារអភិវឌ្ឍប្រទេសជាតិ ពិតណាស់បេីគ្មានការចូលរួមពីស្រ្តីនោះទេ ប្រទេសជាតិរបស់យេីងក៏គ្មានការអភិវឌ្ឍដូចពេលបច្ចុប្បន្ននេះទេ នេះក៏ដោយសាតែកិច្ចខិតខំប្រឹងប្រែងរបស់ស្រ្តីចូលរួមយ៉ាងសកម្មដោយមិនខ្លាចនឿយហត់ឡេីយ ពោលគឺស្រ្តីអាចធ្វេីអ្វីបានដូចបុរសដែរ។
ជាចុងបញ្ចប់នាឱកាសនោះផងដែល គណៈអធិបតីបន្ទាប់ពីបញ្ចប់កម្មវិធី បានជូនវត្ថុអនុស្សាវរីយ៍ និងបានបង្ហោះប៉េងប៉ោង ជានិមត្តរូបដេីម្បីអបអរសាទរ ខួបលេីកទី១០៩ ទិវាអន្តរជាតិនារី ៨ មីនា ឆ្នាំ២០២០៕
ប្រភព៖ រដ្ឋបាលខេត្តបន្ទាយមានជ័យ
