នាព្រឹកថ្ងៃព្រហស្បតិ៍ ៩កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៥ ខែមករា ឆ្នាំ២០១៨នេះ នៅចំណុចភូមិព្នៅ ឃុំតាសួស ស្រុកស្វាយជ្រំ ខេត្តស្វាយរៀង ក្រុមអ្នករកស៊ីដឹកដី ដឹកខ្សាច់បានផ្ទុះការតវ៉ា រហូតចង់បិតផ្លូវជាតិលេខ១ ក្រោយក្រុមជញ្ជីងចល័តរបស់ក្រសួងសាធារណការ និងដឹកជញ្ជូន ចាប់ឃាត់រថយន្ដ៧គ្រឿង ដែលដឹកលើសទម្ងន់កំណត់ ។ ឆ្លើយតបនឹងបញ្ហានេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានចាត់ឲ្យលោកប្រធានមន្ទីរសាធារណការ និងដឹកជញ្ជូនខេត្ត លោកនាយកទីចាត់ការអន្តរវិស័យសាលាខេត្ត និងកងកម្លាំងមានសមត្ថកិច្ច ចុះទៅធ្វើការសម្របសម្រួល ដោះស្រាយ និងពន្យល់ដល់ក្រុមអ្នករកស៊ី ធ្វើយ៉ាងកុំឲ្យមានការបិទផ្លូវដែលអាចបង្កឲ្យមានការកកស្ទះ និងធ្វើឲ្យប៉ះពាល់ការចរាចរណ៍របស់ប្អូនប្រជាពលរដ្ឋ ដែលរហូតមកដល់ពេលនេះ ក្រុមការងារបាននិងកំពុងធ្វើការសម្របសម្រួល និងដោះស្រាយ ព្រមទាំងធ្វើការសម្រួលចរាចរណ៍ដើម្បីឲ្យមានដំណើរការជាប្រក្រតីឡើងវិញផងដែរ ៕ ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី២៥ ខែមករា ឆ្នាំ២០១៨)