សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ អញ្ជើញជាអធិបតីភាពក្នុងពិធី បិទសន្និបាតបូកសរុប លទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់រដ្ឋបាលខេត្ត បន្ទាយមានជ័យ នាព្រឹកថ្ងៃអង្គារ ៧កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៣ ខែមករា ឆ្នាំ២០១៧។ ឆ្លៀតក្នុងឱកាសដ៏វិសេសវិសាលថ្លៃថ្លានោះផងដែរ ក្នុងនាមរដ្ឋបាលខេត្តបន្ទាយមានជ័យ ឯកឧត្តម សួន បវរ អភិបាលខេត្តនៃគណៈអភិបាលខេត្តបានរាយការណ៍អំពីលទ្ធផលការងារ និងសមិទ្ធផលរីកចម្រើនលើគ្រប់វិស័យ ព្រមទាំងស្វែងរកដំណោះស្រាយ បញ្ហាប្រឈមនានាដែលកើតមានឡើងពាក់ព័ន្ធនឹងការអនុវត្តតួនាទី ភារកិច្ច ព្រមទាំងលើកទិសដៅនៃអនុវត្តការងារបន្តរបស់រដ្ឋបាលខេត្ត។ ឯកឧត្តមក៏បានលើកឡើងនូវការដាក់ចេញទិសដៅការងារសំខាន់ៗ ចំនួន ២៥ចំនុច សម្រាប់ការអនុវត្តក្នុងឆ្នាំ២០១៨ របស់រដ្ឋបាលខេត្តបន្ទាយមានជ័យផងដែរ។ ជាទីបញ្ចប់ ឯកឧត្តមក៏សូមថ្លែងអំណរសាទរ ចំពោះវត្តមានដ៏ខ្ពង់ខ្ពស់ សម្តេច ឯកឧត្ដម លោកជំទាវ ភ្ញៀវកិត្តិយស សមាជិក សមាជិកា នៃអង្គពិធី និងសូមគោរពជូនពរនូវពុទ្ធពរទាំងប្រាំប្រការ គឺអាយុ វណ្ណៈ សុខៈ ពលៈ និងបដិភាណៈកុំបីឃ្លៀងឃ្លាតឡើយ ។ ប្រភពព័ត៌មាន: រដ្ឋបាលខេត្តបន្ទាយមានជ័យ (ថ្ងៃទី២៣ ខែមករា ឆ្នាំ២០១៨)