បន្ទាយមានជ័យ ៖ រដ្ឋបាលខេត្តបន្ទាយមានជ័យ បានបេីកកិច្ចប្រជុំ គណបញ្ជាឯកភាពរដ្ឋបាលខេត្ត ដេីម្បីដាក់ចេញនូវបទបញ្ជារ ត្រៀមលក្ខណៈទទួលបដិសណ្ឋារកិច្ច ដ៏ខ្ពង់ខ្ពស់សម្តេច តេជោ ហ៊ុន សែន នាយករដ្ឋមន្ត្រី ដែលសម្តេចនឹងអញ្ជើញជាអធិបតីភាព ដ៏ខ្ពង់ខ្ពស់សម្ពោធដាក់ឲ្យដំណេីរការផ្លូវជាតិលេខ៥៨ ពីក្រុងប៉ោប៉ែត ខេត្តបន្ទាយមានជ័យ ទៅក្រុងសំរោង ខេត្តឧត្តរមានជ័យ នាថ្ងៃទី២៦ ខែកុម្ភៈ នាពេលខាងមុខនេះ។
កិច្ចប្រជុំនេះដឹកនាំដោយ ឯកឧត្តម អ៊ុំ រាត្រី អភិបាលខេត្ត និងជាប្រធានគណៈបញ្ជការឯកភាពរដ្ឋបាលខេត្ត អភិបាលរងខេត្ត មន្ទីរ អង្គភាព ស្ថាប័នពាក់ព័ន្ធ កងកម្លាំងប្រដាប់អាវុធទាំង៣ប្រភេទ ដែលធ្វេីឡេីងនៅសាលប្រជុំសាលាខេត្ត "សាល ខ" ថ្ងៃទី១៧ ខែកុម្ភៈ ឆ្នាំ២០២០។
ឯកឧត្តម អ៊ុំ រាត្រី ក៏បានដាក់ចេញនូវបទបញ្ជាយ៉ាងម៉ឹងមាត់ ចំពោះកងកម្លាំងចម្រុះគ្រប់ប្រភេទចូលរួមថែរក្សាសណ្តាប់ធ្នាប់ ពិសេសត្រូវពង្រឹង យកចិត្តទុកដាក់ឲ្យបានម៉ត់ចត់ក្នុងការថែរក្សា ការពារសន្តិសុខ ជូនប្រមុខរាជរដ្ឋភិបាលឲ្យបានល្អក្នុងថ្ងៃប្រារព្វកម្មវិធីនាពេលខាងមុខ។
សូមជម្រាបថា ៖ ផ្លូវជាតិលេខ៥៨ ដែលតភ្ជាប់ពីក្រុងប៉ោយប៉ែត ខេត្តបន្ទាយមានជ័យ ទៅក្រុងសំរោង ខេត្តឧត្តរមានជ័យនេះ ត្រូវបានបើកការដ្ឋានកសាង នៅខែមិថុនា ឆ្នាំ២០១៥ ហើយ ត្រូវបានកសាងរួចរាល់ជាស្ថាពរនៅខែកុម្ភៈ ឆ្នាំ២០១៩។ ហើយផ្លូវជាតិលេខ៥៨នេះ ត្រូវបានកសាងឡើងក្រោមប្រាក់កម្ចីសម្បទានពីរដ្ឋាភិបាល នៃសាធារណៈរដ្ឋប្រជាមានិតចិន ថវិកា និងបដិភាគរបស់រាជរដ្ឋាភិបាលកម្ពុជា ក្នុងចំនួនទឹកប្រាក់១២២លានដុល្លា។ ក្នុងឱកាសចុះពិនិត្យមេីលផ្លូវជាតិលេខ៥៨ កាលពីពេលកន្លងទៅ ឯកឧត្តមទេសរដ្ឋមន្ត្រី ស៊ុន ចាន់ថុល បានក៏បញ្ជាក់ថា ៖ ផ្លូវជាតិលេខ៥៨នេះ ជាប្រភេទផ្លូវក្រាលកៅស៊ូពីរស្រទាប់(DBST)ដែលតភ្ជាប់បីផ្លូវជាតិលេខ៥រង្វង់មូលក្រុងប៉ោយប៉ែត ខេត្តបន្ទាយមានជ័យ ទៅកាន់ផ្លូវជាតិលេខ៥៨ខេត្តឧត្តរមានជ័យ។ ហេីយក្រសួងសាធារណៈការណ៍ ដឹកជញ្ជូន ក៏និងខិតខំកែសម្រួលផ្លូវថ្នល់ពីប្រភេទផ្លូវក្រាលកៅស៊ូពីស្រទាប់(DBST)អោយទៅជាផ្លូវកៅស៊ូ(AC) ដើម្បីធ្វើយ៉ាងណាអោយផ្លូវនៅក្នុងប្រទេសកម្ពុជាកាន់តែមានគុណភាពខ្ពស់ ស្របតាមគោលការណ៍សម្តេចអគ្គមហាសេនាបតីតេជោ ហ៊ុន សែន ដោយធ្វើយ៉ាងណាអោយផ្លូវកាន់តែមានប្រសិទ្ធភាពខ្ពស់៕
ប្រភព៖ រដ្ឋបាលខេត្តបន្ទាយមានជ័យ
