លោក សុខ រស់ អភិបាលរងខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្ត បានអញ្ជេីញជាអធិបតីក្នុងពិធីប្រកាសចូលមុខតំណែងលោក នួន ឧត្តម ជាអភិបាលរង នៃគណៈអភិបាលស្រុករំដួល និងលោក សេក គឹមសាន ជានាយករដ្ឋបាលសាលាស្រុក កាលពីថ្ងៃព្រហស្បតិ៍ ទី២៦ ខែធ្នូ ឆ្នាំ២០១៩នេះ។
ពិធីនេះមានការអញ្ជើញចូលរួមពី លោកនាយករដ្ឋបាលសាលាខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកលោកស្រី អនុប្រធានមន្ទីរ-អង្គភាព លោកនាយករងទីចាត់ការគ្រប់គ្រងធនធានមនុស្សសាលាខេត្ត លោក លោកស្រីជាក្រុមប្រឹក្សាស្រុក គណៈអភិបាលស្រុក មន្ត្រីរាជការសាលាស្រុក និងការិយាល័យនានាជុំវិញស្រុក មេឃុំ ស្មៀនឃុំ និងនាយប៉ុស្តិ៍នគរបាលរដ្ឋបាល តំណាងកងកម្លាំងទាំងបី និងមន្ត្រីពាក់ព័ន្ធជាច្រើនរូបទៀត ។
លោក សុខ រស់អភិបាលខេត្តបានថ្លែងអំណរគុណ និងវាយតម្លៃខ្ពស់ ចំពោះក្រុមប្រឹក្សាស្រុក គណៈអភិបាលស្រុក មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ ប្រជាពលរដ្ឋនៅទូទាំងស្រុក ដែលបានខិតខំប្រឹងប្រែងយកអស់កម្លាំងកាយចិត្ត បំពេញតួនាទីភារកិច្ចប្រកបដោយការសាមគ្គីភាពក្នុងជួរគណៈអភិបាលស្រុក និងមន្ត្រីរាជការទាំងអស់ ធ្វើឲ្យស្រុករបស់ខ្លួន សម្រេចបាននូវលទ្ធផលល្អប្រសើរជាបន្តបន្ទាប់។
លោកអភិបាលរងខេត្តបានបន្តថា គណៈអភិបាលស្រុកនិងអាជ្ញាធរពាក់ព័ន្ធត្រូវយកចិត្តទុកដាក់នូវកិច្ចការមួយចំនួនដូចជា
- ត្រូវបន្តពង្រឹងការផ្តល់សេវាសាធារណៈឲ្យបានល្អជូនប្រជាពលរដ្ឋ។
- ត្រូវមានសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ត្រូវចៀសវាងនូវទំនាស់ផលប្រយោជន៍ និងទំនាស់ដែលកើតចេញពីការប្រើអំណាចមិនត្រឹមត្រូវ។
- គណៈអភិបាលស្រុក ត្រូវរៀបចំធ្វើការបែងចែកតួនាទី ភារកិច្ច និងការទទួលខុសត្រូវក្នុងជួរគណៈអភិបាលស្រុកឲ្យបានច្បាស់លាស់។
- ពង្រឹងការគ្រប់គ្រង និងអភិវឌ្ឍន៍សមត្ថភាពមន្ត្រីរាជការរបស់ស្រុក។
- បង្កើនការសហការក្នុងការថែរក្សា ពង្រឹងសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ ការបង្ការទប់ស្កាត់ និងបង្រ្កាបបទល្មើសនានា ជាពិសេសបទល្មើសគ្រឿងញៀន ចោរកម្ម និងល្បែងស៊ីសងជាដើម។
- ខិតខំរៀបចំសមាហរណកម្មមន្ត្រីរាជការ តាមរចនាសម្ព័ន្ធថ្មី ការជួយពង្រឹងការងារឃុំ ស្មៀនឃុំ លើការងាររដ្ឋបាល និងហិរញ្ញវត្ថុ ព្រោះចាប់ពីឆ្នាំ២០២០ មូលនិធិឃុំ សង្កាត់កើនឡើងច្រើន។
- ត្រូវពង្រឹងពង្រីកកិច្ចសហប្រតិបត្តិការស្រុកជាប់ព្រំដែនអោយបានល្អ៕
ប្រភព៖ រដ្ឋបាលខេត្តស្វាយរៀង