នៅថ្ងៃព្រហស្បតិ៍ ទី១៩ ខែធ្នូ ឆ្នាំ២០១៩ លោក តូច ប៉ូលីវ៉ា អភិបាលរង នៃគណៈអភិបាលខេត្ត និងជាប្រធានក្រុមការងារថ្នាក់ជាតិចុះមូលដ្ឋានក្នុងឃុំថ្នាធ្នង់ ស្រុករំដួល បានអញ្ជើញជាអធិបតីក្នុងវេទិកាសាធារណៈជាមួយបងប្អូនប្រជាពលរដ្ឋនៅវត្តសិរីវង្ស ឃុំថ្នាធ្នង់ ស្រុករំដួល ខេត្តស្វាយរៀង។
អញ្ជើញចូលរួមក្នុងវេទិកានេះមានក្រុមការងារថ្នាក់ជាតិចុះមូលដ្ឋានឃុំថ្នាធ្នង់ លោកអភិបាលរងស្រុករំដួល លោក លោកស្រីសមាជិកក្រុមប្រឹក្សាឃុំថ្នាធ្នង់ លោក លោកស្រីមេភូមិទាំង ៧ភូមិ លោកនាយប៉ុស្ដិ៍ នាយរងប៉ុស្ដិ៍នគរបាលរដ្ឋបាលឃុំថ្នាធ្នង់ និងបងប្អូនប្រជាពលរដ្ឋសរុបចំនួន១៣៨នាក់។
តាមរយៈវេទិកានេះ ប្រជាពលរដ្ឋបានលើកឡើងនូវបញ្ហា និងសំណូមពរមួយចំនួន ដូចខាងក្រោម ៖
១.ការខ្វះខាតអគ្គីសនីប្រើប្រាស់ក្នុងភូមិ
២.បញ្ហាស្នើសុំដាក់លូពីឃុំបុសមន ទៅដល់សាលាស្រុក
៣.បញ្ហាផ្លូវចូលភូមិពិបាកក្នុងការធ្វើដំណើរ។
ក្នុងឱកាសនោះ លោកអភិបាលរងខេត្តបានទទួលនូវបញ្ហាប្រឈមក៏ដូចជាសំណូមពរ ដែលបងប្អូនប្រជាពលរដ្ឋបានលើកឡើង ហើយបានធ្វើការបកស្រាយ និងដោះស្រាយជូនបងប្អូនប្រជាពលរដ្ឋ ព្រមទាំងមានប្រសាសន៍ផ្ដាំផ្ញើដល់អង្គពិធីនូវចំណុចមួយចំនួនដូចតទៅ ៖
១.ផ្សព្វផ្សាយដល់ឪពុកម្ដាយដែលមានកូនទៅរៀន សូមឲ្យប្រុងប្រយ័ត្នកូនចៅករណីលង់ទឹក និងណែនាំកូនចៅចៀសឲ្យឆ្ងាយពីគ្រឿងញៀន ហើយចូលរួមអនុវត្តគោលនយោបាយ ភូមិ ឃុំមានសុវត្ថិភាព
២.សូមឲ្យបងប្អូនប្រជាពលរដ្ឋចូលរួមគោរពច្បាប់ចរាចរណ៍ទាំងអស់គ្នា
៣.សូមឲ្យបងប្អូនទាំងអស់កុំរំលោភយកដីចំណីផ្លូវ ដើម្បីងាយស្រួលក្នុងការពង្រីកផ្លូវទៅថ្ងៃក្រោយ
៤.សូមបងប្អូនចូលរួមសហការជាមួយមន្រ្តីជំនាញអគ្គីសនីកម្ពុជាខេត្ត ដែលចុះមកអូសខ្សែ ដំឡើងបង្គោល និងការត្រួសត្រាយដើមឈើ មែកឈើ នៅតាមផ្លូវ ក្នុងភូមិដ្ឋានជាដើម
៥.សូមបងប្អូនប្រុងប្រយ័ត្ន ករណីអគ្គីភ័យបណ្ដាលមកពីចរន្តអគ្គីសនី ជាពិសេសផ្ទាំងសូឡា៕
ប្រភព៖ រដ្ឋបាលខេត្តស្វាយរៀង