ព្រឹកថ្ងៃពុធ ទី១៨ ខែធ្នូ ឆ្នាំ២០១៩ នៅសាលប្រជុំក្រុមប្រឹក្សាខេត្តមានបើកកិច្ចប្រជុំគណៈកម្មការអន្តរក្រសួង និងអនុគណៈកម្មការខេត្ត ដើម្បីត្រៀមរៀបចំពិធីបុណ្យសមុទ្រខេត្តកំពត លើកទី៨ ជុំទី២។ ពិធីនេះប្រព្រឹត្តឡើងក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម ជាវ តាយ អភិបាលនៃគណៈអភិបាលខេត្តកំពត ព្រមទាំងមានការចូលរួមពីថា្នក់ដឹកនាំមកពីក្រសួងពាក់ព័ន្ធ និងប្រធាន អនុប្រធាន ក៏ដូចជាសមាជិកអនុគណៈកម្មការទាំង៦ សរុបប្រមាណ ១០០នាក់។
ជម្រាបជូនអង្គប្រជុំទាំងមូល ឯកឧត្តមអភិបាលនៃគណៈអភិបាលខេត្តកំពតបានមានប្រសាសន៍ថា រហូតមកដល់ថ្ងៃនេះ កិច្ចការរបស់អនុគណៈកម្មការទាំង៦បានរៀបចំរួចរាល់១០០%ហើយ។
លទ្ធផលទាំងនេះកើតឡើងដោយសារកិច្ចសហការល្អរបស់សមាជិកក្នុងអនុគណៈកម្មការនីមួយៗស្របតាមការចង្អុលបង្ហាញរបស់ឯកឧត្តមប្រធានគណៈកម្មការអន្តរក្រសួង ក៏ដូចជាការដឹកនាំរបស់រដ្ឋបាលខេត្តកំពតផ្ទាល់។
ជាការឆ្លើយតបចំពោះលទ្ធផលការងារទាំងនោះ ឯកឧត្តមរដ្ឋមន្ត្រីក្រសួងទេសចរណ៍បានកោតសរសើរដល់រដ្ឋបាលខេត្តកំពត និងសមាជិកនៃអនុគណៈកម្មការទាំង៦ ដែលបានបំពេញកិច្ចការងារប្រកបដោយភាពរលូនដូចការគ្រោងទុក៕
ប្រភព៖ រដ្ឋបាលខេត្តកំពត
