រសៀលថ្ងៃពុធ ទី១១ ខែធ្នូ ឆ្នាំ២០១៩ ឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ បានដឹកនាំកិច្ចប្រជុំជាមួយក្រុមហ៊ុន Angkor TK Travel & Tours និងក្រុមហ៊ុន Desd Nadion Asia Cambodia ដើម្បីឈ្វេងយល់ពីការខ្វះខាត និងកែសម្រួលដោះស្រាយបានទាន់ពេលវេលា ក្នុងការទាក់ទាញភ្ញៀវទេសចរណ៍បរទេសតាមនាវា។
ឯកឧត្តម គួច ចំរើន អភិបាលខេត្តព្រះសីហនុ បានស្វាគមន៍ ប្រធានក្រុមហ៊ុន Angkor TK Travel & Tours និងក្រុមហ៊ុន Desd Nadion Asia Cambodia ដែលបាន មកជួបពិភាក្សាការងារ ដើម្បីរួមគ្នាដោះស្រាយបញ្ហាប្រឈម ព្រោះវិស័យទេសចរណ៍មានសារ:សំខាន់បង្កើនកំណើនសេដ្ឋកិច្ច និងផ្តល់ការងារជូនប្រជាពលរដ្ឋ។ ស្របតាមគោលនយោបាយជាតិ ចាត់ទុកវិស័យទេសចរណ៍គ្មានផ្សែងនាំមកនូវកំណើនសេដ្ឋកិច្ច បង្កើនប្រាក់ចំណូល របស់ប្រជាពលរដ្ឋ។ ដូច្នេះយើងត្រូវទាក់ទាញ កៀងគរភ្ញៀវទេសចរមកកាន់ព្រះរាជាណាចក្រកម្ពុជា ពិសេសមកកាន់ខេត្តព្រះសីហនុរបស់យើង ទាមទារឱ្យយើងទាំងអស់គ្នាកែលម្អសោភណភាព បរិស្ថាន និងបង្គន់អនាម័យ ព្រមទាំងឱ្យមន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈចូលរួមថែរក្សាសោភណភាព វប្បធម៌ ប្រពៃណី ដើម្បីកំណើនភ្ញៀវទេសចរ និងបង្កើនចំណូលថវិកា។
ដោយឡែក លោកឧកញ៉ា សាយ ជិញ ប្រធានក្រុមហ៊ុន Angkor TK Travel & Tours បានជំរាបជូនថា ក្រុមហ៊ុន បានចាប់ផ្តើមដំណើរការនៅឆ្នាំ២០០៥ នាំភ្ញៀវទេសចរមកពីអឺរ៉ុប និងអាមេរិក ក្នុងមួយឆ្នាំមានភ្ញៀវទេសចរប្រមាណ ៥០.០០០នាក់ មកតាមនាវាទេសចរណ៍មកកាន់ខេត្តព្រះសីហនុ ភ្ញៀវទេសចរកម្សាន្តខេត្តព្រះសីហនុ និងខ្លះទៀតបានបន្តទៅទស្សនារមនីយដ្ឋានអង្គរ ខេត្តសៀមរាប ទន្ទឹមនោះបានស្នើសុំឱ្យរដ្ឋបាលខេត្ត រៀបចំសណ្តាប់ធ្នាប់សាធារណៈ ពិសេសតុៗ និងតាក់ស៊ី ត្រូវមានក្រុមហ៊ុនធានា រ៉ាប់រង ដើម្បីបង្កើនទំនុកចិត្តដល់ភ្ញៀវទេសចរ៕
ប្រភព៖ រដ្ឋបាលខេត្តព្រះសីហនុ