នាព្រឹកថ្ងៃពុធ ទី១១ ខែធ្នូ ឆ្នាំ២០១៩ ឯកឧត្តម ជាវ តាយ អភិបាលនៃគណៈអភិបាលខេត្តកំពត អមដំណើរដោយអភិបាលក្រុង និងចៅសង្កាត់ទាំងប្រាំ ព្រមទាំងថ្នាក់ដឹកនាំមន្ទីរអង្គភាពពាក់ព័ន្ធបានចុះពិនិត្យមើលការកែលម្អសោភ័ណភាពនៅទូទាំងក្រុងកំពត។ ដំណើរត្រួតពិនិត្យបានធ្វើឡើងចាប់ពីចំណុចរង្វង់មូលរូបសំណាកផ្លែទុរេន ជុំវិញបរិវេណពហុកីឡដ្ឋានខេត្ត រហូតដល់គ្រប់ទីតាំងតាមដងផ្លូវសំខាន់ៗនានា។ ឯកឧត្តមអភិបាលនៃគណៈអភិបាលខេត្តបានជំរុញ និងតម្រូវឲ្យកែលម្អឡើងវិញលើចំណុចសំខាន់ៗមួយចំនួន រួមមាន៖
១.ការរៀបចំបំពាក់អំពូលភ្លើងបន្ថែមតាមបណ្តោយផ្លូវនៃបញ្ជាការដ្ឋានតំបន់ប្រតិបត្តិការសឹករងខេត្ត និងមន្ទីរធនធាននទឹក និងឧតុនិយមខេត្តកំពត។
២.កាត់ស្លាកយីហោ និងកែសម្រួលតាមដងផ្លូវជាតិលេខ៣រហូតដល់ចំណុចផ្លូវវាងក្រុង។
៣.បន្តសម្អាតបរិស្ថានជុំវិញក្រុង លើអគារ និងការដ្ឋានកំពុងសាងសង់។
៤.ប្តូរ ឬដកចេញនូវប៉ាណូផ្សព្វផ្សាយផ្សេងៗរបស់ម្ចាស់ក្រុមហ៊ុន សហគ្រាស ក៏ដូចជាហាងលក់ទំនិញផ្សេងៗ។
៥.ជួលជុលរ៉ឺហ្កា គម្របលូឲ្យបានប្រសើរឡើងវិញ។
៦.រៀបចំបន្តចាក់បេតុងលើចំណុចទីលានស្តូបព្រះបាទអង្គឌួង និងបូមខ្សាច់ចាក់ទប់ច្រាំង១០ម៉ែត្រឲ្យបានរួចរាល់។
៧.រៀបចំប្រព័ន្ធលូបង្ហូរទឹកនៅស្តង់ វិថីម្ហូបអាហារឲ្យបានមុនថ្ងៃទី១៨ ខែធ្នូ ឆ្នាំ២០១៩ ជាកំហិត។
៨.រៀបចំចាត់ចែងលាបបពណ៌បង្គោលភ្លើងចាស់ទាំង១២ស្ថិតនៅតាមបណ្តោយដងព្រែកពីគល់ស្ពានថ្មីមកដល់មុខសាលាខេត្ត។
៩.ដាក់ធុងសំរាមថ្មីលើទីតាំងសំខាន់ៗ។
បន្ទាប់ពីបញ្ចប់ការត្រួតពិនិត្យលើការងារសេសសល់ ឯកឧត្តម ជាវ តាយ ក៏បានផ្តល់អនុសាសន៍បន្ថែមទៀតថា អាជ្ញាធររក្រុង និងសង្កាត់ត្រូវចុះណែនាំដល់អាជីវករទាំងអស់បន្តសហការកែលម្អឲ្យបានចប់សព្វគ្រប់មុនពិធីបុណ្យសមុទ្រនាថ្ងៃទី២០ ខែធ្នូ ឆ្នាំ២០១៩ ចូលមកដល់៕
ប្រភព៖ រដ្ឋបាលខេត្តកំពត