នាព្រឹកថ្ងៃព្រហស្បតិ៍ ទី០៥ខែធ្នូ ឆ្នាំ២០១៩ រដ្ឋបាលខេត្ត រៀបចំពិធីបិទការងារអធិការកិច្ច កិច្ចការរដ្ឋបាល នគរបាល និងពន្ធនាគារនៅខេត្តព្រះវិហារ ក្រោមអធិបតី រស់ វរុន រដ្ឋលេខាធិការក្រសួងមហាផ្ទៃ ឯកឧត្តម ខូយ ឃុនហ៊ ប្រធានក្រុមប្រឹក្សាស្តីទី ឯកឧត្តម គោស៊ុ ប៊ុនសឿត អភិបាលខេត្តស្តីទី និងមានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត មេបញ្ជាការកងកម្លាំងទាំងបី អភិបាល-ក្រុមប្រឹក្សាក្រុង ស្រុក អធិការក្រុងស្រុក នាយករដ្ឋបាលក្រុង ស្រុក មេឃុំចៅសង្កាត់ សមាជិក្រុមប្រឹក្សាឃុំសង្កាត់ ជាច្រើនរូប។
មានមតិក្នុងឱកាសនោះ ឯកឧត្តម គោស៊ុ ប៊ុនសឿត អភិបាលខេត្តស្តីទី ស្វាគមន៍យ៉ាងកក់ក្តៅចំពោះវត្តមានឯកឧត្តម រស់ វរុណ រដ្ឋលេខាធិការក្រសួងមហាផ្ទៃ ដែលបានឆ្លៀតឱកាសអញ្ជើញជាអធិបតីក្នុងពិធីបិទការងារអធិការកិច្ច កិច្ចការរដ្ឋបាល នគរបាល និងពន្ធនាគារខេត្តព្រះវិហារនាពេលនេះ ។
ឯកឧត្តម រស់ វរុណ អនុរដ្ឋលេខាធិការក្រសួង មហាផ្ទៃ បានប្រសាសន៍ទៅកាន់អង្គពិធីអំពីប្រវត្តិនៃចាប់ដំណើរការការងារអធិការកិច្ចរបស់ក្រសួងមហាផ្ទៃតាំងឆ្នាំ១៩៩៣ ដោយយោងតាមអនុក្រឹត្យលេខ១៦ អនក្រ ស្តីពីតួនាទីភារកិច្ចរបស់មន្រ្តីអធិការកិច្ច និងបានកែសម្រួលជាបន្តបន្ទាប់ស្របតាមស្ថានភាពជាក់ស្តែង។ ឯកឧត្តមបានជម្រាបជូនពីគោលបំណងនិងសារៈសំខាន់នៃការចុះអធិការកិច្ច គឺដើម្បីជួយដល់ រដ្ឋបាលខេត្ត ក្រុង ស្រុក ឃុំសង្កាត់ លើការពិនិត្យ កែសម្រួលនូវកង្វះខាតនៃការអនុវត្តមុខងាររបស់មន្រ្តី និងការវិធានការទប់ស្កាត់ការប្រព្រឹត្តខុសឆ្គង របស់មន្រ្តីឲ្យបានទាន់ពេលវេលា ជួយបំពេញសមត្ថភាពដល់មន្រ្តីបំពេញមុខងារតាមរយះការណែនាំ ការបណ្តុះបណ្តាលជំនាញ ឲ្យទទួលបាន ប្រសិទ្ធភាពខ្ពស់ ដើម្បីធានានូវប្រសិទ្ធភាពការងារគ្រប់គ្រង ដឹកនាំរបស់ស្ថាប័ន អង្គភាពលើការងារផ្តល់សេវាសាធារណៈជូនប្រជាពលរដ្ឋប្រកបដោយតម្លាភាព។លើសពីនេះទៀតជាឱកាសនៃការស្វែងយល់ពីបញ្ហាប្រឈមនានាក្នុងការបំពេញតួនាទីប្រចាំថ្ងៃរបស់មន្រ្តី។
ជាចុងក្រោយឯកឧត្តអនុរដ្ឋលេខាធិការ បានណែនាំដល់រដ្ឋបាលគ្រប់ជាន់ថ្នាក់ ខិតខំបំពេញ ការងារឲ្យបានត្រឹមត្រូវស្របតាមលិខិតបទដ្ឋានគតិយុត្តិ តួនាទីភារកិច្ចរបស់ខ្លួន កែលំអរចំណុចខ្វះខាតរបស់ខ្លួនក្នុងការងារបម្រើសេវាសាធារណៈ ជូនប្រជាពលរដ្ឋ ស្របតាមកំណែទម្រង់ស៊ីជម្រៅ របស់រាជរដ្ឋាភិបាល ឲ្យកាន់ទទួលបានប្រសិទ្ធភាពខ្ពស់នាថ្ងៃអនាគត៕
ប្រភព៖ រដ្ឋបាលខេត្តព្រះវិហារ