បន្ទាយមានជ័យ ៖ នៅថ្ងៃទី៩ ខែវិច្ឆិកា ឆ្នាំ២០១៩ រដ្ឋបាលខេត្តបន្ទាយមានជ័យ បានរៀបចំពិធីអបអរសាទរ ខួបអនុស្សាវរីយ៍លេីកទី៦៦ (៩ វិច្ឆិកា ១៩៥៣-៩ វិច្ឆិកា ២០១៩) នៃទិវាបុណ្យឯករាជ្យជាតិ ដែលធ្វេីឡេីងក្រោមអធិបតីភាពដ៏ខ្ពង់ខ្ពស់ឯកឧត្តម អន ស៊ុំ សមាជិកព្រឹទ្ធសភា ឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ដែលមានការអញ្ជេីញចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត ថ្នាក់ដឹកនាំមន្ត្រីរាជការ ស្ថាប័ន អង្គភាពជុំវិញខេត្ត កងកម្លាំងប្រដាប់អាវុធគ្រប់ប្រភេទ សិស្ស និស្សិត បានចូលរួមធ្វេីឡេីងនៅសាលាខេត្តបន្ទាយមានជ័យ។
ក្នុងឱកាសនៃការរៀបចំខួបអនុស្សាវរីយ៍លេីកទី៦៦ នៃបុណ្យឯករាជ្យជាតិនោះដែរ ថ្នាក់ដឹកនាំមន្ត្រីរាជការទូទាំងខេត្តបន្ទាយមានជ័យ បានអញ្ជេីញដាក់កម្រងផ្កា គោរពវិញ្ញាណក្ខន្ធព្រះករុណា ព្រះបាទសម្តេច ព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌនៃព្រះរាជបូជនីយ៍កិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា ដែលពិធីគោរពវិញ្ញាណក្ខន្ធនេះដែលត្រូវបានធ្វេីឡេីងនៅសួនមានជ័យ មុខស្តុបព្រះបាទជ័យវរ្ម័នទី៧។
បន្ទាប់មកគណៈអធិបតីក៏បានអញ្ជេីញប្រារព្វអង្គមិទ្ធីញនៅសាលប្រជុំសាលាខេត្តបន្ទាយមានជ័យ ក្នុងនោះឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ក៏បានអាននូវសាលិខិតអបអរសាទរ ខួបអនុស្សាវរីយ៍លេីកទី៦៦ នៃបុណ្យឯករាជ្យជាតិ គឺជាថ្ងៃដែលប្រទេសកម្ពុជាទទួលបានឯករាជ្យ ពីអាណានិគមនិយមបារាំង ស្របជាមួយនឹងខួប៦៦ឆ្នាំ។
នាឱកាសនោះគណៈអធិបតីក៏បានអញ្ជេីញព្រលែងសត្វព្រាបជានិមិត្តរូបនៃសន្តិភាព និងបានបង្ហោះប៉េងប៉ោង ដេីម្បីអបអរសាទរនៃបុណ្យឯករាជ្យជាតិផងដែរ៕
ប្រភព៖ រដ្ឋបាលខេត្តបន្ទាយមានជ័យ
