កំពង់ឆ្នាំងៈឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានផ្តាំផ្ញើដល់ថ្នាក់ដឹកនាំ និងកីឡាករទាំងអស់ថាៈក្នុងនាមជាកីឡាករតំណាងអោយខេត្តទាំងមូល ត្រូវខិតខំប្រឹងប្រែងអោយអស់ពីកំលាំងកាយកំលាំងចិត្ត ប្រកួត យកជ័យជំនះអោយបានដោយរក្សាអោយនូវសន្តិសុខសណ្តាប់ធ្នាប់ គោរពបទបញ្ជា របស់គណៈកម្មការជាតិ រៀបចំការប្រណាំងទូក ដោយប្រកាន់ខ្ជាប់នូវវិន័យ សេចក្តីថ្លៃថ្នូ សីលធម៌ សុជីវធម៌ ដ៏ប្រពៃសក្តិសមជាកីឡាករគឺឈ្នះដោយកិត្តិយស។
ឯកឧត្តម បានផ្តាំផ្ញើ បែបនេះនាព្រឹក ថ្ងៃទី៨ ខែវិច្ឆិកា ឆ្នាំ២០១៩ នៅវត្តកំពង់ត្រឡាចក្រោមស្ថិតក្នុងស្រុកកំពង់ត្រឡាច ខេត្តកំពង់ឆ្នាំង ក្នុងពិធីជួបសំណេះសំណាលជាថ្នាក់ដឹកនាំ និង កីឡាករអំុទូកចំនួន១៣៦០នាក់ ស្រីចំនួន ១៦០នាក់ មុនទៅចូលរួមប្រកួតថ្នាក់ជាតិនៅរាជធានីភ្នំពេញ។ ក្នុងពិធីនោះក៏មានការចូលរួមពីឯកឧត្តម ឡុង ឈុនឡៃ ប្រធានក្រុមប្រឹក្សាខេត្ត ឯកឧត្តមលោកជំទាវសមាជិកក្រុមប្រឹក្សាខេត្ត អភិបាលរងខេត្ត លោកលោកស្រីថ្នាក់ដឹកនាំមន្ទីរជុំវិញខេត្ត អាជ្ញាធរ ក្រុង ស្រុកចូលរួមផងដែរ។
ឯកឧត្តម ឈួរ ច័ន្ទឌឿន បានផ្តាំផ្ញើបន្តថាៈកីឡាករទាំងអស់ត្រូវមានសាមគ្គីភាពទូលំទូលាយ និងត្រូវចេះជួយទុក្ខធុរៈគ្នាទៅវិញទៅមកក្នុងគ្រាមានអាសន្នកើតឡើង ត្រូវថែទាំសុខភាពផ្ទាល់ខ្លួអោយ
បានល្អទាំងការដើរហើរ ការសំរាក ការហូបចុក ដើម្បីអោយមានសុខភាពល្អ កំលាំងមាំមួនយកជ័យជំនះអោយបានលើគូរប្រកួត។
ឯកឧត្តមក៏បានជូនពរដល់កីឡាករទាំងអស់សូមមានសុវត្ថិភាពល្អក្នុងពេលធ្វើដំណើរទាំងពេលទៅនិងពេលត្រឡប់មកលំនៅដ្ឋានវិញ។
ឯកឧត្តម អម សុភា អភិបាលរងខេត្ត បានអោយដឹងថាៈទូកនៅខេត្តកំពង់ឆ្នាំងមាៈចំនួន២៥ក្នុងនោះទូកចែវបុរសចំនួន១៣,ទូកចែវនារីចំនួន១,ទូកអុំបុរសខ្នាតអន្តរជាតិចំនួន៩,ទូកអុំបុរសខ្នាតវែងចំនួន១,និង ទូកអុំនារីខ្នាតវែងចំនួន១។ ដោយឡែកទូកទាំង២៥នេះ មកពីក្រុង ស្រុកចំនួន៦ និង មាន កីឡាករកីឡាការនីសរុបចំនួន១.៣៦០នាក់ស្រី១៦២នាក់។
នៅចុងបញ្ចប់នៃពិធី ក៏មានការអុំ ចែវប្រណាំងសាកល្បង នៅដងទន្លេមុខវត្តកំពង់ត្រឡាចក្រោមផងដែរ៕
ប្រភព៖ រដ្ឋបាលខេត្តកំពង់ឆ្នាំង