កងកម្លាំងមានសមត្ថកិច្ចក្នុងខេត្តកណ្ដាលបានត្រៀមខ្លួនរួចរាលក្នុងការការពារសន្តិសុខ សុវត្តិភាព ជូនប្រជាពលរដ្ឋក្នុងឱកាសពិធីបុណ្យឯករាជជាតិ និងព្រះរាជពិធីបុណ្យអុំទូក ដែលនឹងត្រូវឈានចូលមកដល់ក្នុងពេលខាងមុខនេះ។
នេះជាការលើកឡើងរបស់ឯកឧត្តម ម៉ៅ ភិរុណ អភិបាលខេត្តកណ្ដាល នៅក្នុងកិច្ចប្រជុំត្រៀមរៀបចំផែនការណ៍ការពារ សុន្តិសុខ សុវត្តិភាព នៅក្នុងពិធី ពិធីបុណ្យឯករាជជាតិ និងព្រះរាជពិធីបុណ្យអុំទូកកាលពីរសៀលថ្ងៃទី០៦ ខែវិច្ឆិកា ឆ្នាំ២០១៩។ កិច្ចប្រជុំនេះដែរមានការអញ្ជើញចូលរួម ឯកឧត្តម លោកជំទាវ អភិបាលរងខេត្ត កងកម្លាំងប្រដាប់អាវុធទាំង៣ និងលោកអភិបាលក្រុង-ស្រុកទាំង១១ ទូទាំងខេត្ត។ ឯកឧត្តមអភិបាលខេត្តបន្តថា ដើម្បីធានាឱ្យបាននូវ សុខសុវត្តិភាព សណ្ដាប់ធ្នាប់ របៀបរៀបរយ នៅក្នុងពិធីបុណ្យឯករាជជាតិ និងព្រះរាជពិធីបុណ្យអុំទូក នៅពេលខាងមុខ ពិសេសទប់ស្កាត់ និងប្រឆាំងដាច់ខាត រាល់ឧបាយកលរបស់ក្រុមឧទាមក្រៅច្បាប់ និងជនមួយក្ដាប់តូច ដែលមានបំណងចង់ផ្ដួលរំលំរាជរដ្ឋាភិបាលស្របច្បាប់ ចង់ធ្វើរដ្ឋប្រហារ បង្កអសន្តិសុខសង្គម និងបង្កអស្ថេរភាពជតិ។ ឯកឧត្តមអភិបាលខេត្ត បានស្នើឱ្យកងកម្លាំងទាំង៣ មិនត្រូវអត់អោនឱ្យ ជនណាម្នាក់ ឬក្រុមណាមួយដែល ចូលរួមក្នុងធ្វើរដ្ឋប្រហារ អំពើក្បត់ និងបង្កអស្ថេរភាពជាតិឡើយ។ ឯកឧត្ដមអភិបាលខេត្ត បានអំពាវនាវដល់ប្រជាពលរដ្ឋទាំងអស់ កុំចាញបោកការបោកបញ្ឆោត របស់ក្រុមឧទ្ទាមក្រៅច្បាប់ និងបក្សពួក ក្នុងការចូលរួម ប៉ុនប៉ងបំផ្លាញ សុខសន្តិភាព ស្ថេរភាព ផ្ដួលរំលំរាជរដ្ឋាភិបាលស្របច្បាប់ និងធ្វើរដ្ឋប្រហារ ដែលនាំឱ្យបងប្អូនមានទោសឧបឃាត ត្រូវផ្តន្ទាទោសជាប់គុក ពី ១៥ឆ្នាំ ទៅ ៣០ឆ្នាំ យោងតាមមាត្រា ៤៨១ នៃក្រមព្រហ្មទណ្ឌ នៃព្រះរាជាណាចក្រកម្ពុជា ហើយអ្នកចូលរួមក៍មានទោសដែរ គឺជាប់គុកពី ៥ឆ្នាំទៅ២០ឆ្នាំ តាមមាត្រា៤៥៣ នៃក្រមព្រហ្មទណ្ឌ៕
ប្រភព៖ រដ្ឋបាលខេត្តកណ្តាល
