ក្រុមប្រឹក្សាខេត្ត នាព្រឹកថ្ងៃទី០៥ ខែវិច្ឆិកា ឆ្នាំ២០១៩ នេះ បានបើកវេទិកាផ្សព្វផ្សាយ និងគ្រោះយោបល់ លើកទី១ អាណត្តិទី៣ ឆ្នាំ២០១៩ នៅបរិវេណវត្តសេរីចំប៉ា ស្ថិតនៅភូមិមេព្រីង ឃុំមេព្រីង ស្រុកបាធាយ នាព្រឹកថ្ងៃទី០៥ ខែវិច្ឆិកា ឆ្នាំ២០១៩ ក្រោមអធិបតីភាព ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្ដម អ៊ុន ចាន់ដា អភិបាលខេត្តកំពង់ចាម ។
ឯកឧត្តម ខ្លូត ផន ប្រធានក្រុមប្រឹក្សាខេត្ត វេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តកំពង់ចាម អាណត្តិទី៣ នាថ្ងៃនេះ ធ្វើឡើង ដើម្បី ផ្តល់ព័ត៌មាន ដល់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ សហគមន៍ប្រជាពលរដ្ឋ និងអ្នកពាក់ព័ន្ធអំពីសកម្មភាពនានា របស់ក្រុមប្រឹក្សា និងគណៈអភិបាលខេត្ត ក្នុងការឆ្លើយតបទៅនឹងសំណើទាំងឡាយ របស់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ និងសហគមន៍ប្រជាពលរដ្ឋ ប្រមូល ពិភាក្សាអំពីសំណើ និងមតិយោបល់នានា សម្រាប់សកម្មភាពឆ្នាំខាងមុខ ដែលមានការចូលរួម ពីសមាជិកក្រុមប្រឹក្សា គណៈអភិបាលខេត្ត សមាជិកក្រុមប្រឹក្សា គណៈអភិបាលក្រុង-ស្រុក សមាជិកក្រុមប្រឹក្សាឃុំ-សង្កាត់ រួមនឹងតំណាង សហគមន៍ប្រជាពលរដ្ឋ និងអ្នកពាក់ព័ន្ធដទៃទៀត ផងដែរ ។
គូសបញ្ជាក់ដែរថា អង្គវេទិកា បានដំណើរការ ដោយការលើកឡើង នូវសំណួរ និងសំណូមពរ ពីសំណាក់អ្នកចូលរួម ដោយផ្ទាល់មាត់ និងលាយលក្ខណ៍ជាអក្សរ ចំនួន ២០ករណី ទៅលើបញ្ហាមួយចំនួន ដូចជា ៖ ការតបណ្ដាញ ទឹក ស្អាត អគ្គិសនី ការសាងសង់ផ្លូវ ប្រព័ន្ធលូ រំដោះទឹក របងសាលារៀន ...។ ល។ ជាមួយនោះដែរ ថ្នាក់ដឹកនាំ មន្ត្រីជំនាញ និងអាជ្ញាធរពាក់ព័ន្ធ បានធ្វើការដោះស្រាយ និងបកស្រាយ បំភ្លឺជូនប្រជាពលរដ្ឋ ប្រកបដោយប្រសិទ្ធភាព គ្រប់ទាំង ២០ករណី ផងដែរ ។
ក្នុងឱកាសនោះដែរ ឯកឧត្តម អ៊ុន ចាន់ដា អភិបាល ខេត្តកំពង់ចាម បានសំណូមពរ ដល់បងប្អូន ប្រជាពលរដ្ឋ ឲ្យចូលរួម ក្នុងការអនុវត្តន៍ គោលនយោបាយ ភូមិ ឃុំ មានសុវត្ថិភាព ដោយចូលរួមទប់ស្កាត់ បទល្មើសគ្រឿងញៀន ល្បែងស៊ីសង គ្រប់ប្រភេទ និងបើកបរ ត្រូវគោរពច្បាប់ចរាចរណ៍ ផងដែរ ។ ក្រៅពីនោះ ឯកឧត្តម អភិបាលខេត្ត ក៏បានធ្វើការផ្សព្វផ្សាយ ឲ្យបងប្អូនប្រជាពលរដ្ឋ បានយល់ជ្រាប អំពីសភាពការណ៍វិវឌ្ឍថ្មីៗ តាមខ្លឹមសារ របស់រដ្ឋាភិបាល សំដៅពង្រឹងសតិអារម្មណ៍ បងប្អូនកុំឲ្យលង់ជឿតាមឩ បាយកល ដ៏ស្មោគគ្រោក របស់ក្រុមឧទ្ទាម ក្រៅច្បាប់ ហើយនាំគ្នា ចូលរួមគាំទ្រ ក្នុងការថែរក្សា ការពារសុខសន្តិភាព សណ្តាប់ធ្នាប់ និងការអភិវឌ្ឍន៍ប្រទេសជាតិ ក្រោមការដឹកនាំ ដ៏ឈ្លាសវៃ របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា ។ ជាមួយគ្នានោះ ឯកឧត្តម អភិបាលខេត្ត ក៏ បានធ្វើការអំពាវនាវ ឲ្យបងប្អូនប្រជាពលរដ្ឋ ចូលរួមពិសារអំបុកខ្មែរ ថែជាតិ សាសនា ព្រះមហាក្សត្រ នៅ ថ្ងៃទី៩ វិច្ឆិកា ទាំងអស់គ្នា ។
គួរកត់សម្គាល់ដែរថា ការបើកវេទិកាសាធារណៈនេះ ក៏ជាផ្នែកមួយ បានផ្ដល់ឱកាស ជូនប្រជាពលរដ្ឋ បានប្រាស្រ័យទាក់ទង គ្នា ទៅវិញទៅមក ជាមួយអាជ្ញាធរ សមត្ថកិច្ច សង្គមស៊ីវិល និងវិស័យ ឯកជន បានផ្លាស់ប្ដូរ នូវបទពិសោធន៍ និងផ្ដល់យោបល់ ប្រឹក្សាអំពីអាទិភាព នៃការអភិវឌ្ឍន៍មូលដ្ឋាន ជាពិសេស ការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ប្រកបដោយចីរភាព តម្លាភាព និងប្រសិទ្ធភាព ផងដែរ៕
ប្រភព៖ រដ្ឋបាលខេត្តកំពង់ចាម
