ព្រឹកថ្ងៃអាទិត្យ ទី០៣ ខែវិច្ឆិកា ឆ្នាំ២០១៩ រដ្ឋបាលខេត្តសៀមរាប ដែលដឹកនាំដោយ លោក លី សំរឹទ្ធ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានជួបពិភាក្សាការងារជាមួយប្រតិភូខណ្ឌ Uijeongbu រដ្ឋធានី Seoul នៃសាធារណរដ្ឋកូរ៉េ ស្តីពីការពង្រឹងទំនាក់ទំនងកិច្ចសហប្រតិការមិត្តភាពកម្ពុជា-កូរ៉េ ដែលដឹកនាំដោយ លោកអភិបាលខណ្ឌ Uijeongbu និងប្រតិភូអមដំណេីរ ដោយមានការចូលរួមពី លោកនាយកទីចាត់ការផែនការ និងវិនិយោគ លោកនាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ និងលោកប្រធានការិយាល័យសេដ្ឋកិច្ច និងសង្គមកិច្ច នៃទីចាត់ការអន្តរវិស័យ នៅបន្ទប់ប្រជុំរដ្ឋបាលខេត្តសៀមរាប។
ក្នុងកិច្ចជំនួបពិភាក្សានេះ ផ្តោតសំខាន់លើចំណងសម្ព័ន្ធមេត្រីភាព និងកិច្ចសហប្រតិបត្តិការរវាងខណ្ឌនិងខេត្តទាំងពីរ និងការផ្តល់លក្ខខណ្ឌអនុគ្រោះចំពោះជនជាតិកូរ៉េដែលរស់នៅ និងបម្រើការងារក្នុងខេត្តសៀមរាប ក៏ដូចជាប្រជាជនកម្ពុជាដែលកំពុងរស់នៅ និងធ្វើការក្នុងខណ្ឌម៉ាប៉ូហ្គូផងដែរ។
ទន្ទឹមនឹងនេះ លោក លី សំរិទ្ធ អភិបាលរងខេត្ត បានមានមតិស្វាគមន៍គណៈប្រតិភូខាងលើ និងរៀបរាប់អំពីប្រវត្តិនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលព្រះរាជពិធីនេះ នឹងប្រព្រឹត្តទៅក្នុងពេលឆាប់ៗនេះ។ ជាមួយគ្នានេះ លោកអភិបាលរងខេត្ត ក៏បានបង្ហាញនូវសក្តានុពលរបស់ខេត្ត ជាពិសេស ការងារពាក់ព័ន្ធនឹងកិច្ចសហប្រតិបត្តការរវាងកម្ពុជា-កូរ៉េផងដែរ។
ដោយឡែក លោក យូ ដុងជ្យុន អភិបាលខណ្ឌ ម៉ាប៉ូហ្គូ បានថ្លែងអំណរគុណចំពោះការស្វាគមន៍របស់រដ្ឋបាលខេត្តសៀមរាប ហើយលោកបានអញ្ជើញប្រតិភូខេត្តសៀមរាប ដើម្បីទស្សនកិច្ចនៅខណ្ឌម៉ាប៉ូហ្គូតាមពេលវេលាសមស្រប ដើម្បីលោកបានទទួលស្វាគមន៍ ព្រមទាំងបង្ហាញនូវតំបន់សេដ្ឋកិច្ច ទេសចរណ៍ និងវប្បធម៏ក្នុងខណ្ឌម៉ាប៉ូហ្គូ ជូនគណៈប្រតិភូខេត្តសៀមរាប។ ម្យ៉ាងវិញទៀត លោកអភិបាលខណ្ឌបានមានប្រសាសន៍ថា បន្ទាប់ពីបំពេញបេសកកម្មនេះ លោក នឹងធ្វើការស្រង់ស្ថិតិពលករកម្ពុជា ដែលបាន និងកំពុងធ្វើការនៅក្នុងខណ្ឌរបស់លោក ដើម្បីបង្កលក្ខណៈងាយស្រួយគ្រប់បែបយ៉ាង ដើម្បីពួកគេមានសិទ្ធដូចប្រជាជនកូរ៉េដែរ៕
ប្រភព៖ រដ្ឋបាលខេត្តសៀមរាប
