(ត្បូងឃ្មុំ)៖ ឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ បានលើកឡើងថា សូមក្មួយៗចង់ចាំថា អនាគតក្មួយៗអាស្រ័យលើប្រទេសមានសុខសន្តិភាព បើប្រទេសចលាចលនោះ គឺអនាគត ក្តីស្រម័យរបស់ក្មួយៗ នឹងរលាយបាត់បង់ ដោយសារប្រទេសនឹងធ្លាក់ចូលភ្លើងសង្គ្រាមជាថ្មីម្តងទៀត។
ឯកឧត្តម ជាម ច័ន្ទសោភ័ណ ថ្លែងបែបនេះ ក្នុងឱកាសឯកឧត្តម និងលោកជំទាវអញ្ជើញជាអធិបតីក្នុងពិធីបើកបវេសនកាលឆ្នាំសិក្សា២០១៩-២០២០ កាលពីព្រឹកថ្ងៃទី១ ខែវិច្ឆិកា ឆ្នាំ២០១៩នេះ និងចែកប័ណ្ណសរសើរ ព្រមទាំងផ្តល់រង្វាន់ ដល់សិស្សពូកែ និងផ្តល់វត្ថុអនុស្សាវរីយ៍ដល់លោកគ្រូ-អ្នកគ្រូ ដែលចូលនិវត្តន៍ ដោយមានចូលរួមពីសំណាក់ អភិបាលរងខេត្ត ថ្នាក់ដឹកនាំមន្ទីរអង្គភាព លោកគ្រូ អ្នកគ្រូឪពុក ម្ដាយ និងអាណាព្យាបាលសិស្សានុសិស្ស យ៉ាងច្រើនកុះករ នៅវិទ្យាល័យ ប៊ុន រ៉ានី ហ៊ុនសែន មេមត់ ក្នុងស្រុកមេមត់ ខេត្តត្បូងឃ្មុំ។
ឯកឧត្តម ជាម ច័ន្ទសោភ័ណ បានបន្តថា ចំពោះក្មួយៗសិស្សានុសិស្សទាំងអស់ គឺជាអ្នកកាន់កូនសោរសម្រាប់បើកជោគវាសនារបស់ខ្លួននាពេលអនាគត ដូចនេះសូមក្មួយៗចង់ចាំថាគឺមានតែការអប់រំ និងចំណេះដឹងប៉ុណ្ណោះទេ ដែលអាចបើកផ្លូវឲ្យទទួលបានអនាគតរុងរឿង ជាពិសេសត្រូវស្រលាញ់ជាតិនិយមពិតប្រាកដ។
បន្ថែមលើសពីនេះ ឯកឧត្តមអភិបាលខេត្ត បានបញ្ជាក់ជាថ្មីទៀតថា ឯកឧត្តមរួមជាមួយមន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋទូទាំងខេត្ត រួមគ្នាជាមួយរាជរដ្ឋាភិបាលកម្ពុជា ប្រកាសប្រឆាំងដាច់ខាត និងសូមថ្កោលទោស ចាត់ការតាមច្បាប់ រាល់ទង្វើ និងផែនការទាំងឡាយណា ដែលចង់ធ្វើឲ្យប្រទេសកម្ពុជារងភាពវឹកវរ ធ្លាក់ចូលភ្លើងសង្គ្រាមដូចនាពេលអតីតកាល ដ៍សែនឈឺចាប់នោះ៕
ប្រភព៖ រដ្ឋបាលខេត្តត្បូងឃ្មុំ