ថ្ងៃទី០១ ខែវិច្ឆិកា ឆ្នាំ២០១៩ នៅទូទាំងប្រទេសសំរាប់សិស្សគ្រប់គ្រឹៈស្ថានគឺជាថ្ងៃដែល សិស្សទាំងអស់ អបអរសាទរថ្ងៃចាប់ផ្ដើមជីវិតសិក្សាដំបូងរបស់កូន ក្មួយ ចៅតូចៗដែលទើបគ្រប់អាយុត្រូវចូលសាលារៀន និងជាថ្ងៃដែលក្មួយៗសិស្សានុសិស្ស និស្សិតរបស់យើង បន្តចូលរៀនសាលារៀន នៅកំរឹតថ្នាក់ខ្ពស់បន្តទៀត ក្នុងមនោសញ្ចេតនា រីករាយកក់ក្ដៅ និងមោទនភាពបំផុត។
ជាមួយគ្នានេះដែរនៅវិទ្យាល័យ ហ៊ុន សែន តាខ្មៅ ខេត្តកណ្ដាល សិស្សជិត ២០០០នាក់បានជួបជុំប្រារព្ធពិធីបើកបវេសនកាលឆ្នាំសិក្សាថ្មីរបស់ខ្លួនប្រកបដោយទឹកមុខញញឹម និងសង្ឃឹមក្នុងថ្ងៃថ្មីរបស់ខ្លួន។ ការអប់រំប្រកបដោយថីរភាព ពិតជាមានសារៈសំខាន់ដើម្បីធានាការផ្ដល់សេវាអប់រំប្រកបដោយគុណភាព និងបរិយាប័ន្ន ដែលផ្ដល់ឱកាសស្មើៗគ្នាដល់កុមារ និងយុវជនកម្ពុជាទាំងក្នុងប្រព័ន្ធ និងក្រៅប្រព័ន្ធនៅទូទាំងប្រទេស។
ឯកឧត្ដម គីម រិទ្ធី អភិបាលរងខេត្តកណ្ដាល បានថ្លែងបែបនេះនៅកាន់សិស្សក្នុងឱកាសបើកបវេសនកាលឆ្នាំសិក្សាថ្មី នៅវិទ្យាល័យហ៊ុន សែនតាខ្មៅ ខេត្តកណ្ដាល។ ឯកឧត្ដមបានទៀតថា ពេលនេះរាជរដ្ឋាភិបាលបាន នឹងកំពុងខិតខំប្រឹងប្រែងក្នុងការអភិវឌ្ឍសង្គម សេដ្ឋកិច្ចបន្តទៀត និងបានចាត់ទុកការអភិវឌ្ឍធនធានមនុស្ស គឺជាអាទិភាពទី១ រួមជាមួយនឹងការប្ដេជ្ញាឱ្យបាននូវមុំទី១ គឺ ការពង្រឹងគុណភាពអប់រំវិទ្យាសាស្រ្ត និងបច្ចេកវិទ្យា តាមរយៈការទាញយកផលប្រយោជន៍ ពីការអនុវត្តភាពនៅក្នុង តំបន់ និងអន្តរជាតិដើម្បីធានាបានកំណើនសេដ្ឋកិច្ចខ្ពស់ប្រកបដោយថីរភាព៕
ប្រភព៖ រដ្ឋបាលខេត្តកណ្តាល
