ឯកឧត្តម អ៊ុន ចាន់ដា អភិបាលខេត្តកំពង់ចាម ស្នើដល់ប្រជា ពលរដ្ឋ មានការអត់ធ្មត់ ដើម្បី ការពារនូវសុវត្តិភាព ដោយ តម្រូវឲ្យធ្វើចរាចរណ៍ នៅតាមផ្លូវវាង ជាបណ្ដោះអាសន្នសិន ។ ការស្នើឡើងនេះ ធ្វើឡើងនាឱកាស ឯកឧត្តម អភិបាលខេត្ត អមដំណើរដោយថ្នាក់ដឹកនាំ មន្ត្រីរាជការ នៃមន្ទីរ អង្គភាព ពាក់ព័ន្ធ និងអាជ្ញាធរមូលដ្ឋាន អញ្ជើញចុះពិនិត្យស្ថានភាពស្ពានស្រុត ១កន្លែង ស្ថិតនៅឃុំគៀនជ្រៃ ស្រុកកំពង់សៀម ខេត្តកំពង់ចាម នាព្រឹកថ្ងៃទី៣១ ខែតុលា ឆ្នាំ២០១៩ នេះ។
ឯកឧត្ដម អ៊ុន ចាន់ដា មានប្រសាសន៍បញ្ជាក់ឲ្យដឹងថា ដោយសារស្ថានភាពទឹកជំនន់ទន្លេមេគង្គឆ្នាំ២០១៩នេះ បានជន់ឡើងលឿនយ៉ាងគហគ់ ក្នុងរយៈពេលតែ ១ខែប៉ុណ្ណោះ។ ជាមួយនោះទឹកបានស្រកចុះទៅវិញ ក៏លឿនដែរ ដែលបានបង្កការខូចខាតនូវហេដ្ឋារចនាសម្ព័ន្ធជាច្រើន នៅក្នុងភូមិសាស្ត្រ នៃខេត្តកំពង់ចាម ជាពិសេសក្រុងស្រុក នៅតាមបណ្ដោយដងទន្លេមេគង្គតែម្ដង។ យ៉ាងណាម៉ិញ ស្រុកដែលទទួលរងការខូចខាតច្រើនជាងគេគឺ ស្រុកកំពង់សៀម ។ ជាក់ស្ដែង ពេលនេះ កត្តាធម្មជាតិនេះបានធ្វើឲ្យប៉ះពាល់ស្ពាន ១កន្លែង ស្ថិតនៅឃុំគៀនជ្រៃ ស្រុកកំពង់សៀមប្រឈមទៅនឹងការបាក់ស្រុត ដោយសារទឹកហូច្រោះ។ ដូច្នេះដើម្បីដោះស្រាយបញ្ហាគ្រោះថ្នាក់ដោយថាហេតុ អាជ្ញាធរ បានសម្រេច ឲ្យផ្អាកការចរាចណ៍ លើស្ពាននេះ ជាបណ្ដោះអាសន្នសិនដោយបញ្ជៀសឲ្យពួកគាត់ ទៅចរាចរណ៍ នៅលើផ្លូវផ្សេងវិញ។ ទន្ទឹមនឹងនោះ ដើម្បី សម្រួលដល់ការធ្វើដំណើរ របស់ប្រជាពលរដ្ឋ យើងក៏បានចុះមកពិនិត្យស្ថានភាពស្ពានឈើ ១កន្លែង ស្ថិតនៅឃុំគៀនជ្រៃក្នុង ក្នុងស្រុកកំពង់សៀម ដើម្បី ជម្លៀសប្រជាពលរដ្ឋ ឲ្យមកប្រើប្រាស់ស្ពាន នេះជាបណ្ដោះអាសន្នវិញ។ ទន្ទឹមនឹងនោះដែរ យើងក៏ស្នើទៅដល់ក្រសួងជំនាញ ដើម្បី សិក្សាស្ពានឈើនេះ និងផ្លូវផ្សេងៗទៀត ដើម្បី សម្រួលដល់ការធ្វើដំណើរ របស់បងប្អូនប្រជាពលរដ្ឋ ផងដែរ។
សូមបញ្ជាក់ថា ស្ពានថ្ម១កន្លែងស្ថិតនៅក្នុងទីតាំងខាងលើ មានទំហំ ៩០ គុណនឹង ៤ម បានកសាងឡើង នាអំឡុងឆ្នាំ២០០១-២០០២ ។ មកដល់បច្ចុប្បន្ន ស្ពាននេះ បានទទួលរងការបាក់ស្រុតដី ដោយសារទឹកហូរច្រោះ នាពេលទឹកសម្រកចុះ បណ្ដាលឲ្យលិចចេញគ្រឹះផ្នែកខាងក្រោម នៃសរសរជើងស្ពាន ចំនួន ១ដើម។ ទន្ទឹមជាមួយនោះ ដើម្បី បញ្ជៀសគ្រោះថ្នាក់ជាយថាហេតុ អាជ្ញាធរ បានបិទបណ្ដោះអាសន្ន ដោយមិនតម្រូវឲ្យមធ្យោបាយធំៗធ្វើចរណ៍ឡើយ៕
ប្រភព៖ រដ្ឋបាលខេត្តកំពង់ចាម
