រដ្ឋបាលខេត្តរតនគិរី នាថ្ងៃទី ០៣ ខែមករា ឆ្នាំ២០១៨ នេះ បានចេញសេចក្តីជូនដំណឹងស្តីពី ការជ្រើសរើសប្រធាន អនុប្រធានការិយាល័យប្រជាពលរដ្ឋ នៃរដ្ឋបាលខេត្តរតនគិរី ចំនួន ០២ រូប ដើម្បីបំពេញការងារនៅការិយាល័យប្រជាពលរដ្ឋ ។ យោងសេចក្តីជូនដំណឹងរបស់រដ្ឋបាលខេត្ត ការិយាល័យប្រជាពលរដ្ឋមាន មានតួនាទីទទួល និងសម្រុះសម្រួលដោះស្រាយបណ្តឹងក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិ ក្នុងគោលបំណងលើកកម្ពស់អភិបាលកិច្ចល្អក្នុងការផ្តល់សេវា និងការអភិវឌ្ឍសេដ្ឋកិច្ចមូលដ្ឋានប្រកបដោយតម្លៃភាព គណនេយ្យភាព និងប្រសិទ្ធភាព សំដៅបង្កើនជំនឿទុកចិត្តរបស់ប្រជាពលរដ្ឋនៅមូលដ្ឋាន ។ ប្រធាន អនុប្រធានការិយាល័យប្រជាពលរដ្ឋ នឹងត្រូវជ្រើសរើសតាមរយៈការបោះឆ្នោតដោយគណៈកម្មាធិការបោះឆ្នោតមួយ ដែលមានសមាសភាពមកពីក្រុមប្រឹក្សាខេត្ត សមាគមក្រុមប្រឹក្សាក្រុង ស្រុក ឃុំ សង្កាត់ តំណាងសភាពាណិជ្ជកម្មខេត្ត និងតំណាងអង្គការសង្គមសុីវិល ។ ប្រធានការិយាល័យនឹងត្រូវទទួលបានប្រាក់ឧបត្ថម្ភប្រចាំខែ ជាង ១ លានរៀល និងអនុប្រធានទទួលបានប្រមាណជាង ៨០ ម៉ឺនរៀល ។ ប្រភពព័ត៌មាន: រដ្ឋបាលខេត្តរតនគិរី (ថ្ងៃទី០៣ ខែមករា ឆ្នាំ២០១៨)