កំពង់ឆ្នាំង៖ ព្រឹកថ្ងៃពុធ ទី៣០ ខែតុលា ឆ្នាំ២០១៩ នៅសាលាស្រុករលាប្អៀរ មានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ឆ្នាំង អាណត្តិទី៣ ឆ្នាំ២០១៩ ក្រោមអធិបតីភាព ឯកឧត្ដម ឡុង ឈុនឡៃ ប្រធានក្រុមប្រឹក្សាខេត្ត និងឯកឧត្ដម ស៊ុន សុវណ្ណារិទ្ធិ អភិបាលរងខេត្ត ដោយមានអញ្ជើញចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត នាយករងរដ្ឋបាល នាយកទីចាត់ការ ប្រធានអង្គភាពសាលាខេត្ត ប្រធានមន្ទីរ អង្គភាពជុំវិញខេត្ត ក្រុមប្រឹក្សាស្រុក គណៈអភិបាលស្រុក ការិយាល័យជុំវិញស្រុក ក្រុមប្រឹក្សាស្រុក មេភូមិ ឃុំ តំណាងប្រជាពលរដ្ឋមកពីឃុំក្នុងស្រុកសាមគ្គីមានជ័យ វិស័យឯកជន អង្គការមិនមែនរដ្ឋាភិបាល និងអ្នកពាក់ព័ន្ធ។
អង្គវេទិកាបានដំណើរការ ឯកឧត្តម ឡុង ឈុនឡៃ និងឯកឧត្តម ស៊ុន សុវណ្ណារិទ្ធិ ព្រមទាំងថ្នាក់នាំមន្ទីរជំនាញ និង អាជ្ញាធរស្រុកក៏បានបំភ្លឺនៅសំណូមពរ និងសំណួរ ដែលអាជ្ញាធរដែនដី និងតំណាងប្រជាពលរដ្ឋបានលើកឡើងក្នុងអង្គវេទិកា ចំពោះសំណូមពរ និងសំណួរ ដែលនៅសេសសល់ឯកឧត្តមបានអោយអាជ្ញាធរដែនដីសហការជាមួយអង្គភាពជំនាញសុំយោបល់ថ្នាក់លើបន្តពិនិត្យដោះស្រាយស្របតាមនិតិវិធីច្បាប់ អោយទាន់ពេលវេលា។
ក្នុងឱកាសនោះផងដែរ ឯកឧត្តម ស៊ុន សុវណ្ណារិទ្ធិ បានមានប្រសាសន៍បញ្ជាក់ថាៈ រាជរដ្ឋាភិបាលកម្ពុជាដែលដឹកនាំដោយ សម្តេចតេជោ តែងតែគិតគូរ ដោះស្រាយនូវសំណូម និងជីវភាពរស់នៅរបស់ប្រជាពលរដ្ឋ គ្រប់ទីកន្លែង ដោយមិនប្រកាន់ពូជសាន៍ និងនិន្នាការនយោបាយឡើយ។ ឯកឧត្តម ក៏បានផ្តាំផ្ញើអោយអាជ្ញាធរដែនដី ត្រូវសហការជាមួយសមត្ថកិច្ចគ្រប់លំដាប់ថ្នាក់ទាំងអស់ ត្រូវផ្សព្វផ្សាយដល់ប្រជាពលរដ្ឋ តាមមូលដ្ឋានរបស់ខ្លួន ត្រូវរួមគ្នាថែរក្សាសុខសន្តិភាព ស្ថេរភាព អោយបានគង់វង្សទុកអោយក្មេងជំនាន់ក្រោយ និងប្រឆាំងដាច់ខាត់រាល់ឧបាយកលពួកជនអគតិដែលចង់បំផ្លាញសុខសន្តិភាពនៅកម្ពុជានាពេលបច្ចុប្បន្ន៕
ប្រភព៖ រដ្ឋបាលខេត្តកំពង់ឆ្នាំង
