ថ្លែងនៅក្នុងកិច្ចប្រជុំផ្សព្វផ្សាយសភាពសភាពការណ៍ថ្មីៗនៅកម្ពុជា ជូនដល់មន្ត្រីរាជការ អជ្ញាធរមូលដ្ឋាន និងកងកម្លាំងមានសមត្ថកិច្ចជាង៥០០នាក់ នៅព្រឹកថ្ងៃទី៣០ ខែតុលា ឆ្នាំ២០១៩នេះ ឯកឧត្តម នួន ផា ប្រធានក្រុមប្រឹក្សាខេត្តកណ្តាលបានជុំរុញ ឲ្យអាជ្ញាធរពាក់ព័ន្ធទាំងអស់ត្រូវបន្តចូលរួម ទប់ស្កាត់បដិវត្តពណ៌ដែលកើតចេញពីក្រុម ឧទ្ទាមក្រៅច្បាប់ដែលមានបំណងប៉ុនប៉ងចង់ផ្តួលរំលំរាជរដ្ឋាភិបាលស្របច្បាប់។ ពិសេស កងកម្លាំងមានសមត្ថកិច្ចគ្រប់លំដាប់ថ្នាក់ត្រូវខិតខំអនុវត្តតួនាទីភារកិច្ចប្រកបដោយស្មារតីទទួលខុសត្រូវខ្ពស់ ដើម្បីចូលរួមអនុវត្តនូវកម្មវិធីនយោបាយ យុទ្ធសាស្ត្រចតុកោណសំណាក់កាលទី៤របស់រាជរដ្ឋាភិបាលកម្ពុជាឲ្យកាន់តែមានប្រសិទ្ធភាព និងទទួលបានលទ្ធផលជោគជ័យថែមទៀត។
ថ្លែងក្នុងឱកាសនោះដែរ ឯកឧត្តមបណ្ឌិត ម៉ៅ ភិរុណ អភិបាលខេត្តកណ្តាល បានក្រើនរំលឹកដល់មន្ដ្រីរាជការ ទាំងអស់ ត្រូវតែបន្ដយកចិត្តទុកដាក់ពង្រឹងសមត្ថភាពការងារ ព្រមទាំងចូលរួមថែរក្សាសន្តិសុខ ស្ថិរភាពសង្គមជូនប្រជាពលរដ្ឋឱ្យបានកាន់តែប្រសើឡើង។
ឯកឧត្តមអភិបាលក៏បានជំរុញ ដល់មន្ត្រីរាជការ កំលាំងប្រដាប់អាវុធ ត្រូវផ្សព្វផ្សាយ ណែនាំដល់ប្រជាជនទាំងអស់កុំចូលរួមជាមួយក្រុមឧទ្ទាមក្រៅច្បាប់ ដែលប្រើប្រាស់ឧបាយកលគ្រប់រូបភាព ក្នុងបំណងវិ់លត្រឡប់ចូលស្រុក ដើម្បីធ្វើចលនាបដិវត្តន៍ព៌ណ និងធ្វើរដ្ឋប្រហារ ផ្តួលរំលំរាជរដ្ឋាភិបាលស្របច្បាប់ និងរំខានភាពសុខសាន្ត របស់ប្រជាជនយើង នៅថ្ងៃទី ៩វិច្ឆិកា ឆ្នាំ២០១៩ ខាងមុខនេះ។
ជាមួយគ្នានេះដែរ ឯកឧត្តមអភិបាលខេត្ត បានណែនាំដល់កងកម្លាំងមានសមត្ថកិច្ចទាំងអស់ ត្រូវតែយកចិត្តទុកដាក់ និងគោរពតាមអនុសាសន៍ណែនាំរបស់ថ្នាក់ដឹកនាំដែលបានដាក់ឱ្យអនុវត្តប្រកបដោយប្រសិទ្ធភាពខ្ពស់ លើមូលដ្ឋាន នៃការរក្សាការពារសុខ សន្តិភាព ស្ថិរភាព និងសុវត្ថិភាពក្នុងសង្គម ការពង្រឹងកិច្ចដំណើរការនៃលទ្ធិប្រជាធិបតេយ្យ។ ហើយមន្រ្តីទាំងអស់ត្រូវ ចូលរួមជាមួយអាជ្ញាធរមានសមត្ថកិច្ច ក្នុងការអនុវត្តគោលនយោបាយភូមិ-ឃុំមានសុវត្ថិភាព ដើម្បីបង្ការ ទប់ស្កាត់ និងបង្រ្កាបបទល្មើសនានានៅតាមមូលដ្ឋាន សំដៅរួមគ្នាថែរក្សាសុខ សុវត្ថិភាពនៅតាមមូលដ្ឋានភូមិ ឃុំ រៀងៗខ្លួន។ ឯកឧត្តមបានបញ្ជាក់ថា ការចូលរួមរបស់បងប្អូនប្រជាពលរដ្ឋទាំងអស់គ្នា ក្នុងការថែរក្សាការពារសុខ សន្តិភាព ស្ថិរភាពសណ្តាប់ធ្នាប់ និងការអភិវឌ្ឍសង្គម គឺបានបង្ហាញអំពីស្មារតីស្នេហាជាតិយ៉ាងពិតប្រាកដ ដែលជាមូលដ្ឋានគ្រឹះយ៉ាងសំខាន់សម្រាប់កសាង និងអភិវឌ្ឍន៍ប្រទេសជាតិឲ្យកាន់តែសម្បូរសប្បាយជាបន្តទៀត៕
ប្រភព៖ រដ្ឋបាលខេត្តកណ្តាល
