ថ្លៃងនៅក្នុងកម្មវិធីចែករំលែកបទពិសោធន៍ នៃការងារស្ម័គ្រចិត្តរបស់សហភាពសហព័ន្ធយុវជនកម្ពុជា ស្រុកកោះធំ(ស.ស.យ.ក) ដោយមានការចូលរួមពី យុវជន(ស.ស.យ.ក)ជាង ៥០០នាក់ កាលពីថ្ងៃទី២៧ ខែតុលា ឆ្នាំ២០១៩ ឯកឧត្តម គីម រិទ្ធី អភិបាលរងខេត្ត និងជាប្រធានសហភាពសហព័ន្ធយុវជនកម្ពុជា ខេត្តកណ្ដាល  បានបញ្ជាក់ថា ការចូលរួមក្នុងការងារសង្គមដោយស្ម័គ្រចិត្តគឺបានផ្ដល់ឱកាសឲ្យ យើងបានកសាងកិត្តិយស កេរ្តិ៍ឈ្មោះ មិត្តភាព ប្រជាប្រិយភាព និងឥទ្ធិពលដែលអាចធ្វើយើងទទួលបានភាពជោគជ័យច្រើននៅក្នុងមូលដ្ឋាន។

      ឯកឧត្តមបានបន្តថា ក្រៅពីការងារសង្គម យុវជន(ស.ស.យ.ក)ស្រុកកោះធំ ត្រូវខិតខំបង្កើន មិត្តភ័ក្ត ដែលប្រកបដោយគុណភាព ជាមិត្តភាពពិតប្រាកដអាចពឹងពាក់គ្នាបានទៅវិញទៅមក ក្នុងគ្រាជួបការលំបាកនានា។ ឯកឧត្តមក៏បានជំរុញឲ្យយុវជន(ស.ស.យ.ក)ស្រុកកោះធំ ត្រូវខំកសាងបណ្ដាញយុវជន បណ្ដាញនារីបន្ថែមទៀត យ៉ាងហោចណាស់ ១ឃុំឲ្យបាន ១០០នាក់ តាមរយៈការលេងកីឡាបាល់ទាត់ បាល់ទះ តាមរយៈការងារមនុស្សធម៌ ការងារអប់រំ និងបរិស្ថាន ដើម្បីប្រមូលផ្តុំកម្លាំងគ្នាចូលរួមបម្រើឲ្យផលប្រយោជន៍សង្គមជាតិយើង ដោយត្រូវខិតខំបង្កើនសមត្ថភាព ត្រូវមានសេចក្តីក្លាហានក្នុងការឡើងបញ្ចេញមតិយោបល់ ពង្រឹងរចនាសម្ព័ន្ធ តួនាទីភារកិច្ចដឹកនាំ របស់(ស.ស.យ.ក)ស្រុកឲ្យច្បាស់លាស់ និងរឹងមាំ។

      ក្នុងឱកាសនោះឯកឧត្តមក៏បានជំរុញដល់សមាជិក(ស.ស.យ.ក)ស្រុកកោះធំទាំងអស់ត្រូវចូលរួមផ្លាស់ប្ដូរនូវបទពិសោធន៍ល្អៗពីគ្នាទៅវិញទៅមក ក្នុងកម្មវិធីនេះឲ្យបានផុសផុល ត្រូវលើកពីបញ្ហាប្រឈម កង្វះខាត់ ផែនការអនុវត្តបន្ត និងសំនូមពរនានា ដើម្បីរកដំណោះស្រាយឲ្យបានទាន់ពេលវេលា។

      សួរបញ្ជាក់ថា ដើម្បីបង្កើនបរិយាកាសសប្បាយរីករាយ និងបង្កើនមិត្តភាព សាមគ្គីភាពឲ្យកាន់តែស្អិតរមួតបន្ថែមទៀតនោះ ក្នុងពិធីនេះក៍មានការឡើងច្រៀងលេងកម្សាន្ត ការចាប់ឆ្នោតផ្សងសំណាង យកវត្ថុអនុស្សាវរីយ៍មាន ទូរស័ព្ទដៃ Power Bank មួកសុវត្តិភាព  ជូនដល់សមាជិកផងដែរ៕

ប្រភព៖ រដ្ឋបាលខេត្តកណ្តាល