ថ្ងៃថ្មី ខែថ្មី ឆ្នាំថ្មី សមិទ្ធផលថ្មីក្នុងក្រុងស្វាយរៀង! នាព្រឹកថ្ងៃអង្គារ ១រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០២ ខែមករា ឆ្នាំ២០១៨នេះ នៅការិយាល័យឯកឧត្ដមអភិបាលខេត្ត ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញដឹកនាំកិច្ចប្រជុំពិនិត្យលើគម្រោងអភិវឌ្ឍន៍ ពង្រីក និងកែលម្អច្រាំងទន្លេវ៉ៃគោផ្នែកខាងលិច ស្ថិតនៅក្រុងស្វាយរៀង ខេត្តស្វាយរៀង ដើម្បីត្រៀមអនុវត្តនាពេលឆាប់ៗខាងមុខនេះ ។ កិច្ចប្រជុំនេះមានការអញ្ជើញចូលរួមពីលោកនាយករងរដ្ឋបាលសាលាខេត្ត លោកប្រធានមន្ទីរសាធារណការ និងដឹកជញ្ជូនខេត្ត លោកប្រធានមន្ទីរសេដ្ឋកិច្ច និងហិរញ្ញវត្ថុខេត្ត លោកប្រធានមន្ទីរអភិវឌ្ឍន៍ជនបទខេត្ត លោកប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងលោកអភិបាលក្រុងស្វាយរៀង ។ ការអភិវឌ្ឍ និងកែលម្អច្រាំងទន្លេវ៉ៃគោនេះ គឺជាគម្រោងផែនការ និងយុទ្ធសាស្រ្តអភិវឌ្ឍន៍របស់ខេត្ត ដើម្បីលើកកម្ពស់សោភ័ណភាពក្នុងក្រុង និងបង្កើតនូវលំហទីក្រុងបៃតងសម្រាប់ជាទីកម្សាន្ត លំហែអារម្មណ៍ និងហាត់កីឡា ដែលជាផ្នែកមួយចូលរួមចំណែកក្នុងកិច្ចលើកកម្ពស់សុខមាលភាពប្រជាពលរដ្ឋ និងជំរុញចលនាប្រឡងប្រណាំងទីក្រុងស្អាត ៕ ប្រភពព័ត៌មាន: រដ្ឋបាលខេត្តស្វាយរៀង ( ថ្ងៃទី០២ ខែមករា ឆ្នាំ២០១៨)