មន្ត្រីនគបាល គឺមានតួនាទីក្នុងការការពារ ជាតិ សាសនា ព្រះមហាក្សត្រ ការពាររដ្ឋធម្មនុញ្ញ នៃព្រះរាជាណាចក្រកម្ពុជា និងការពារឱ្យបាននូវ រាជរដ្ឋាភិបាលស្របច្បាប់ ដែលកើតចេញពីឆន្ទះរបស់ប្រជាពលរដ្ឋ តាមរយៈការបោះឆ្នោត។ នេះជាការលើកឡើងរបស់ ឯកឧត្ដម នាយឧត្ដមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក ក្នុងពិធី ប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្ដិ មន្ត្រីនគបាលជាតិ នៃស្នងការដ្ឋាននគបាលខេត្តកណ្ដាល កាលពីរសៀលថ្ងៃទី២៤ ខែតុលា ឆ្នាំ២០១៩ នៅស្នងការដ្ឋាននគបាលខេត្ត។
ឯកឧត្ដម នាយឧត្ដមសេនីយ៍ អគ្គស្នងការរងនគរបាលជាតិ បន្តថា ក្នុងករណីមានបុគ្គលណា ឬជនអគតិណា ចង់មកបំបែកបំបាក់ បង្កអសន្តិសុខ សណ្ដាប់ធ្នាប់ ឬផ្ដួលរំលំរាជរដ្ឋាភិបាលស្របច្បាប់ គឺមន្ត្រីនគបាល ត្រូវការពារឱ្យបាន ទោះលះបង់តម្លៃណាក៏ដោយ។ ឯកឧត្ដម នាយឧត្ដម សេនីយ៍ អគ្គស្នងការរងនគរបាលជាតិ ក៏បានថ្លែងកោតសរសើរ ដល់កងកម្លាំងនគរបាលខេត្ដកណ្ដាលទាំងមូល ដែលបានខិតខំប្រឹងប្រែង ទប់ស្កាត់ និងបង្រ្កាបបទល្មើស នៅក្នុងមូលដ្ឋានបានយ៉ាងល្អប្រសើរ។ ឯកឧត្ដម បានផ្ដាំផ្ញើរដល់កងកម្លាំងទាំងអស់ ត្រូវសាមគ្គីភាពល្អ បន្ដខិតខំប្រឹងប្រែង ទប់ស្កាត់ និងបង្រ្កាបបទល្មើស ជាពិសេសបទល្មើសគ្រឿងញៀន និងករណីគ្រោះថ្នាក់ចរាចរណ៍។ ក្រៅពីការងារទាំងអស់នេះ នគរបាលមូលដ្ឋាន ត្រូវខិតខំបម្រើសេវាសាធារណៈ ជូនដល់បងប្អូនប្រជាពលរដ្ឋឲ្យបានល្អប្រសើរ។ មានប្រសាសន៍ក្នុងពិធី ឯកឧត្ដម នៃ ចារី អភិបាលរងខេត្តកណ្ដាល បានស្នើដល់កងកម្លាំងនគរបាលខេត្ដកណ្ដាល ត្រូវមានវិធានការទប់ស្កាត់ និងបង្ក្រាបឱ្យបានទាន់ពេលវេលា ចំពោះផែនការធ្វើរដ្ឋប្រហារ ការញុះញង់ ឧបាយកល និងសកម្មភាពរបស់ក្រុមប្រឆាំង សំដៅថែរក្សាឱ្យបានសន្តិភាព ស្ថេរភាព និងការអភិវឌ្ឍន៍ទេស និងបន្តស្មារតីប្រុងប្រយ័ត្នខ្ពស់ ក្ដាប់ឱ្យបានសភាពការណ៍ថ្មីៗ សម្រេចឱ្យបាននូវទស្សនវិស័យ រួមគ្នាដើម្បីសន្តិភាពកម្ពុជា។ ត្រូវសហការល្អជាមួយអង្គភាពកងកំលាំង មន្ទីរ-អង្គភាពនានា ជុំវិញខេត្ត និងរដ្ឋបាលគ្រប់ជាន់ថ្នាក់ព្រមទាំងរៀបចំឱ្យមានផែនការសកម្មភាព និងវិធានការច្បាស់លាស់ ជាពិសេសការងារប្រយុទ្ធប្រឆាំងគ្រឿងញៀន ស្ដាប់ធ្នាប់ចរាចរណ៍ និងគ្រោះមហន្តរាយនានា។ ឯកឧត្តមបន្តថា កងកម្លាំងនគរបាល ត្រូវពង្រឹងការងារជំនាញដូចជា ការងារគ្រប់គ្រងជនបរទេស ហត្ថពលករបរទេស ការងារសន្តិសុខឯកជន និងការងារប្រយុទ្ធប្រឆាំងអំពើជួញដូរមនុស្ស និងត្រូវបង្កើនប្រសិទ្ធភាព នៃការផ្តល់សេវាជូនប្រជាពឡរដ្ឋ ដូចជា ការផ្ដល់អត្តសញ្ញាណប័ណ្ណ សៀវភៅគ្រួសារ និងសៀវភៅស្នាក់នៅ ព្រមទាំងឯកសាររដ្ឋបាលសំខាន់ៗដទៃទៀត ពិសេសត្រូវពង្រឹងសាមគ្គីភាព និងឯកភាពផ្ទៃក្នុង។
សូមបញ្ជាក់ថា មន្ត្រីនគបាលជាតិ នៃស្នងការដ្ឋាននគបាលខេត្តកណ្ដាល ដែលត្រូវប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិ មានចំនួន២៨រូប ក្នុងនោះថ្នាក់ស្នងការរង២រូប នាយការិយាល័យ២រូប នាយរងការិយាល័យ១៥រូប និងថ្នាក់អធិការរង៩រូប ព្រមទាំងតម្លើងឋានន្តរស័ក្តិជូនមន្ត្រីចំនួន១២រូប វរសេនីយ៍ទោ៣រូប វរសេនីយ៍ត្រី៨រូប និងអនុសេនីយឯក១រូប៕
ប្រភព៖ រដ្ឋបាលខេត្តកណ្តាល