ឆ្លើយតបតាមសំណូមពររបស់ប្រជាពលរដ្ឋ នៅក្នុងវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋានសង្កាត់កំពង់សំណាញ់ កាលពីថ្ងៃទី១៦ ខែតុលា ឆ្នាំ២០១៩កន្លងទៅថ្មីៗនេះ។
នៅព្រឹកថ្ងៃទី២១ ខែតុលា ឆ្នាំ២០១៩ លោក នៃ ចារី អភិបាលរងខេត្តកណ្ដាល និងជាប្រធានក្រុមការងារថ្នាក់ជាតិ ចុះជួយសង្កាត់កំពង់សំណាញ់ បានដឹកនាំមន្ត្រីជំនាញ នៃមន្ទីរសុខាភិបាលខេត្តកណ្ដាល និងដោយមានការអញ្ជើញចូលរួម លោកប្រធានមន្ទីរសុខាភិបាលខេត្ត អាជ្ញាធរសង្កាត់ បានចុះបាញ់ថ្នាំសម្លាប់មូស នៅក្នុងភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល។ ក្នុងការបាញ់ថ្នាំសម្លាប់មូស ឯកឧត្ដម នៃ ចារី បានអំពាវនាវឱ្យបងប្អូនប្រជាពលរដ្ឋ ត្រូវលប់បំបាត់ប្រភពនៃជម្រកមូសខ្លា ដោយសំអាតបរិស្ថាននៅក្នុងផ្ទះរបស់ខ្លួន គឺធ្វើយ៉ាងណាកុំឲ្យមានកន្លែងដក់ទឹកបាន សំបកកង់ សំបកដូង សំបកកង់ឡាន ត្រូវលុប និងជីកកប់ឲ្យបានស្អាត មិនត្រូវបណ្ដោយទុកឱ្យរបស់ដែលដក់ទឹកបាន នាំឲ្យកើតមានដង្កូវទឹក និងមានមុខខ្លា ដែលអាចធ្វើអោយបងប្អូនប្រជាពលរដ្ឋ កើតជង្ងឺគ្រុនឈាម ដោយសារមូសខ្លាខាំ៕
ប្រភព៖ រដ្ឋបាលខេត្តកណ្តាល
