អភិបាលខេត្តតាកែវ ឯកឧត្តម អ៊ូច ភា បានធ្វើការជម្រុញ ក៏ដូចជាណែនាំទៅដល់សភា ពាណិជ្ជ កម្ម ខេត្តតាកែវ ត្រូវមានចក្ខុវិស័យវែងឆ្ងាយ និងផែនការច្បាស់ ពីគម្រោងការគៀងគររកអ្នកវិនិយោគិន មកវិនិយោគនៅក្នុងខេត្តរបស់ខ្លួន ដើម្បីបង្កើតឪកាសការងារដល់បងប្អូនប្រជាពលរដ្ឋក្នុងខេត្ត មានការងារ ធ្វើ កាន់តែច្រើនឡើយ ។
ថ្លែងនៅក្នុងឪកាសអនុញ្ញាតដល់សភាពាណិជ្ជកម្មខេត្តតាកែវ ដឹកនាំដោយលោក ជីប ភក្តីភាព ប្រធានសភាពាណិជ្ជកម្មខេត្ត ចូលជួបសម្តែងការគួរសម និងសុំមតិយោបល់ល្អៗពីឯកឧត្តមអភិបាលខេត្ត នាព្រឹកថ្ងៃច័ន្ទ ទី២១ ខែតុលា ឆ្នាំ២០១៩ ឯកឧត្តម អ៊ូច ភា អភិបាលខេត្ត បានមានប្រសាសន៍បន្តថា ការងារ ដែលសភាពាណិជ្ជកម្ម ចាំបាច់ត្រូវធ្វើ គឺការគៀងគររកអ្នកវិនិយោគិនទាំងក្នុង និងក្រៅប្រទេស មកបណ្តាក់ទុករកស៊ីនៅក្នុងខេត្តរបស់ខ្លួន ដោយធ្វើយ៉ាងណា ត្រូវមានវិធីសាស្រ្តក្នុងការអូសទាញ ក្រុមអ្នក វិនិយោគឲ្យបាន តាមដែលអាចធ្វើទៅបាន ព្រោះតួនាទីសភាពាណិជ្ជកម្មនេះ សំខាន់ខ្លាំងណាស់ អាច និយាយបានថាសម្របសម្រួលការប្រកបអាជីវកម្មក្នុងខេត្តនិងទាក់ទាញអ្នកវិនិយោគក្នុងស្រុកនិងនៅក្រៅប្រទេស មកវិនិយោគនៅក្នុងខេត្ត ដើម្បីបង្កើតការងារឲ្យបានច្រើនជូនបងប្អូនប្រជាពលរដ្ឋបានធ្វើ មាន ចំណូល សម្រាប់ទ្រទ្រង់ជីវភាពនិងជួយកាត់បន្ថយការចំណាកស្រុករបស់ប្រជាពលរដ្ឋផងដែរ។ ឯកឧត្តម អ៊ូច ភា បន្ថែមទៀតថា សភាពាណិជ្ជកម្មគឺជាស្ថាប័នតំណាងវិស័យឯកជនក្នុងខេត្ត សម្រាប់ជួយដំណោះរការអាជីវកម្មនៅក្នុងខេត្តនិងជួយទាក់ទាញ ការវិនិយោគ ដើម្បីអភិវឌ្ឍន៍ សេដ្ឋកិច្ច ខេត្ត ឲ្យមានការរីកចម្រើន ស្របតាមគោលនយោបាយរបស់រាជរដ្ឋាភិបាលកម្ពុជា ដើម្បីបង្កើតការងា រលើក កម្ពស់ សហគ្រាសធុនតូច និងមធ្យម សហគ្រិនភាព ពង្រឹងភាពប្រកួតប្រជែងក្បាលម៉ាស៊ីន និងជំរុញ សេដ្ឋកិច្ច ក្នុងខេត្ត ឲ្យមានដំណើរការបានឆាប់រហ័សបន្ថែមទៀត។ បើតាមឯកឧត្តម អ៊ូច ភា អភិបាលខេត្តតាកែវ ក៏បានជម្រុញទៅដល់សភាពាណិជ្ជកម្មខេត្ត ត្រូវតែចងក្រងទីផ្សារសហគមន៍របស់បងប្អូនប្រជាពលរដ្ឋ ក្នុងមូលដ្ឋាន ពិសេសទីផ្សារសហគមន៍ ពងទាកូន និងបង្កងធម្មជាតិរបស់ខេត្ត ដោយធ្វើយ៉ាងណាត្រូវបង្កើនការ ផលិត និងការ លក់ របស់ បងប្អូន ប្រជាពលរដ្ឋ នឹងជួយរកទីផ្សារបន្ថែមទៀតសម្រាប់ពួកគាត់ ព្រោះប្រសិនបើសភាពាណិជ្ជកម្ម ជួយសម្រប សម្រួលច្រើនលើបញ្ហារកទីផ្សារនេះ វានឹងជួយឲ្យបងប្អូនប្រជាពលរដ្ឋ មានប្រាក់ចំណូលគ្រប់គ្រាន់ ហើយជីវភាពនឹងកាន់តែធូរធារថែមទៀត ៕
ប្រភព៖ រដ្ឋបាលខេត្តតាកែវ