នាព្រឹកថ្ងៃចន្ទ ទី២១ ខែតុលា ឆ្នាំ២០១៩ នៅសាលប្រជុំសាលាខេត្ត ឯកឧត្តម ជាវ តាយ អភិបាលនៃគណៈអភិបាលខេត្ត និងជាប្រធានគណៈបញ្ជាការខេត្ត បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ផ្សព្វផ្សាយវិធានការចាំបាច់នានាសម្រាប់ទប់ស្កាត់សភាពការណ៍បច្ចុប្បន្ន។
អញ្ជើញចូលរួមក្នុងកិច្ចប្រជុំនេះរួមមាន គណៈអភិបាលខេត្ត លោកប្រធានសាលាដំបូងខេត្ត ព្រះរាជអាជ្ញានៃអយ្យការអមសាលាដំបូងខេត្ត យោធភូមិភាគ៣ បញ្ជាការដ្ឋានការពារកោះឆ្នេរ បញ្ជាការដ្ឋានកងពលតូចអន្តរាគមន៍លេខ១១ មូលដ្ឋានសមុទ្រ ទីបញ្ជាការជួរមុខ នាយកដ្ឋាននគរបាលព្រំដែនទឹក នាយក នាយករងរដ្ឋបាលខេត្ត មន្ទីរ អង្គភាពជុំវិញខេត្ត អភិបាលក្រុង ស្រុក នាយក នាយករងទីចាត់ការ អង្គភាព ចំណុះសាលាខេត្ត សរុប ៧៩នាក់។
កិច្ចប្រជុំមានរបៀបវារៈដូចខាងក្រោម៖
-ផ្សព្វផ្សាយអំពីការទទួលទាមអំបុកការពារ ជាតិ សាសនា ព្រះមហាក្សត្រ នៅទូទាំងខេត្ត ដេីម្បីអបអរសាទរបុណ្យឯករាជ្យជាតិ ៩ វិច្ឆិកា និងពិធីបុណ្យអុំទូក បណ្តែតប្រទីប អកអំបុក សំពះព្រះខែ នៅថ្ងៃទី៩ ខែវិច្ឆិកា ឆ្នាំ២០១៩។
-ផ្សព្វផ្សាយផែនការលេខ ០១១ ផក ចុះថ្ងៃទី០៩ ខែតុលា ឆ្នាំ២០១៩ ស្តីពីកិច្ចការពារព្រះរាជសុវត្ថិភាពថ្វាយ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេច ព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការដ៏ខ្ពង់ខ្ពស់។
-ផ្សព្វផ្សាយផែនការលេខ ០១២ ផក ចុះថ្ងៃទី០៩ ខែតុលា ឆ្នាំ២០១៩ ស្តីពីកិច្ចការពារសុវត្ថិភាពស្ថាប័នកំពូល និងឥស្សរៈជនជាន់ខ្ពស់របស់ជាតិ។
-ផ្សព្វផ្សាយសេចក្តីណែនាំលេខ ០៣៩ សណន ចុះថ្ងៃទី០៩ ខែតុលា ឆ្នាំ២០១៩ ស្តីពីការរៀបចំផែនការការពារសុវត្ថិភាពមន្រ្តីថ្នាក់ដឹកនាំថ្នាក់ក្រោមជាតិ។
-សេចក្តីរាយការណ៍ របស់លោកស្នងការនគរបាលខេត្ត លោក លោកស្រី អភិបាលក្រុង ស្រុក។