ព្រឹកថ្ងៃសុក្រ ទី១៨ ខែតុលា ឆ្នាំ២០១៩ នៅសាលាស្រុកបរិបូណ៌ មានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ឆ្នាំង អាណត្តិទី៣ ឆ្នាំ២០១៩ ក្រោមអធិបតីភាព ឯកឧត្ដម ឡុង ឈុនឡៃ ប្រធានក្រុមប្រឹក្សាខេត្ត និងឯកឧត្ដម អម សុភា អភិបាលរងខេត្ត ដោយមានអញ្ជើញចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត នាយករងរដ្ឋបាល នាយកទីចាត់ការ ប្រធានអង្គភាពសាលាខេត្ត ប្រធានមន្ទីរអង្គភាពជុំវិញខេត្ត ក្រុមប្រឹក្សាស្រុក គណៈអភិបាលស្រុក ការិយាល័យជុំវិញស្រុក ក្រុមប្រឹក្សាឃុំ មេភូមិ តំណាងសហគមន៍ ប្រជាពលរដ្ឋ វិស័យឯកជន អង្គការមិនមែនរដ្ឋាភិបាល និងអ្នកពាក់ព័ន្ធសរុប១៦៨នាក់ ស្រី១៩នាក់។
បន្ទាប់ពីឯកឧត្តមឡុង ឈុនឡៃ ប្រធានក្រុមប្រឹក្សាខេត្ត ថ្លែងសុន្ទរកថាបើកវេទិកាផ្សព្វផ្សាយ និងពិគ្រោះយោបល់រួចមក លោក លៀង ជុំសុបិន្តនាយករងរដ្ឋបាលសាលាខេត្ត បានអានរបាយការណ៍សង្ខេបស្ដីពីសមិទ្ធផលសម្រេចបានក្នុងឆ្នាំ២០១៩ និងបញ្ហាប្រឈមមួយចំនួនរបស់រដ្ឋបាលខេត្ត។
លោកហង្ស ពិសី នាយកទីចាត់ការផែនការ និងវិនិយោគសាលាខេត្ត បានអានរបាយការណ៍សង្ខេបស្ដីពីវឌ្ឍនភាពនៃការអនុវត្តកម្មវិធីវិនិយោគបីឆ្នាំរំកិល (២០១៩-២០២១) ប្រចាំឆ្នាំ២០១៩ និងទិសដៅកម្មវិធីវិនិយោគបីឆ្នាំរំកិល(២០២០-២០២២)។
ថ្លែងក្នុងឱកាសនោះ ឯកឧត្តមអម សុភា អភិបាលរងខេត្ត បានមានប្រសាសន៍ថា ការប្រារព្ធធ្វើវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សា អាណត្តិទី៣ ជាការបង្ហាញអំពីសមិទ្ធផលនានាដែលសម្រេចបានរយ:ពេលមួយឆ្នាំ និងគម្រោងវិនិយោគផែនការអភិវឌ្ឍខេត្ត។ ជាងនេះទៅទៀត វេទិកាពិគ្រោះយោបល់នេះ បានផ្ដល់ឱកាសដល់អាជ្ញាធរមូលដ្ឋានគ្រប់លំដាប់ថ្នាក់ និងប្រជាពលរដ្ឋ ចូលរួមពិគ្រោះយោបល់ សំដៅចូលរួមកែលម្អចំណុចដែលនៅខ្វះខាត និងស្វែងដំណោះស្រាយចំពោះបញ្ហាប្រឈមសំខាន់ៗដែលកើតមាននៅមូលដ្ឋាន ដើម្បីលើកកម្ពស់ប្រសិទ្ធភាពក្នុងការបំពេញការងាររបស់អាជ្ញាធរ សំដៅលើកស្ទួយជីវភាពប្រជាពលរដ្ឋឲ្យកាន់តែរីកចម្រើនថែមទៀត។
គូសបញ្ជាក់ថា៖ ប្រធានបទដែលត្រូវបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត រួមមាន
១. ការងារសន្ដិសុខ សណ្ដាប់ធ្នាប់សង្គម (អំពីការអនុវត្តគោលនយោបាយភូមិ ឃុំមានសុវត្ថិភាព និងសុវត្ថិភាពចរាចរណ៍)
២. កិច្ចការអភិវឌ្ឍន៍មូលដ្ឋាន
៣. ការផ្ដល់សេវារដ្ឋបាល របស់រដ្ឋបាលថ្នាក់ក្រោមជាតិ
៤. ការគ្រប់គ្រងសោភ័ណភាព អនាម័យ បរិស្ថាន និងធនធម្មជាតិ និងបញ្ហាពាក់ព័ន្ធមួយចំនួនទៀត
នៅក្នុងវេទិកានោះ ក៏មានលើកជាសំណួរ និងសំណូមពរដោយផ្ទាល់មាត់ និងលាយលក្ខណ៍ជាអក្សរមានចំនួន១១ចំណុច ក្នុងនោះថ្នាក់ដឹកនាំ មន្ត្រីជំនាញ និងអាជ្ញាធរពាក់ព័ន្ធ បានបកស្រាយបំភ្លឺមួយចំនួន រីឯបញ្ហាដែលនៅសេសសល់បានទទួលយកសម្រាប់ចុះពិនិត្យ សិក្សាឲ្យបានច្បាស់លាស់ជាបន្តទៀត ដើម្បីស្វែងរកដំណោះស្រាយឲ្យមានប្រសិទ្ធភាព៕
ប្រភព៖ រដ្ឋបាលខេត្តកំពង់ឆ្នាំង
