រសៀលថ្ងៃទី១៤ ខែតុលា ឆ្នាំ២០១៩រដ្ឋបាលខេត្តបានរៀបចំកិច្ចប្រជុំគណៈកម្មការរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តសៀមរាប ក្រោមអធិបតីភាពឯកឧត្តម ទៀ សីហា អភិបាលនៃគណៈអភិបាលខេត្តដោយមានការចូលរួមពីអភិបាលរងនៃគណៈអភិបាលខេត្ត នាយក-នាយករងរដ្ឋបាល នាយក-នាយករងទីចាត់ការ អភិបាលក្រុង-ស្រុកទាំង១២ ប្រធាន-អង្គភាពនានាជុំវិញខេត្ត និងក្រុមគ្រួសារសហភាពសហព័ន្ធកម្ពុជាខេត្តសៀមរាប។
ក្នុងកិច្ចប្រជុំ ឯកឧត្តម អភិបាលខេត្តបានជំរុញអោយមន្ទីរ អង្គភាពត្រូវយកចិត្តទុកដាក់ចំពោះកីឡាករដោយគិតគូពីបញ្ហាសុខភាពនិងការស្នាក់នៅរបស់ពួកគាត់ក្នុងកំឡុងពេលមកហាត់សមរហូតដល់ប្រកួតចប់។ជាមួយគ្នានេះ សមត្ថកិច្ចជំនាញទាំអស់ត្រូវយកចិត្តទកដាក់បញ្ហាសន្តិសុខ សណ្តាប់ធ្នាប់ និងបញ្ហាបរិស្ថានជាដើម។
ក្នុងឆ្នាំនេះ រដ្ឋបាលខេត្តនឹងរៀបចំប្រាព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុករយៈពេល៤ថ្ងៃ ដែលនឹងប្រព្រឹត្តិទៅនាថ្ងៃទី០៩-១២ ខែវិច្ឆិកា ឆ្នាំ២០១៩ នៅតាមបណ្តោយដងស្ទឹងសៀមរាប ចាប់ពីស្ពានអតីតមន្ទីរទេសចរណ៍ចាស់ រហូតដល់ស្ពានវត្តដំណាក់៕
ប្រភព ៖ រដ្ឋបាលខេត្តសៀមរាប
