ថ្នាក់ដឹកនាំមន្ត្រីរាជការទូទាំងខេត្តបន្ទាយមានជ័យ ដឹកនាំដោយឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ នឹងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានប្រារព្ធគោរពវិញ្ញណក្ខន្ធ ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប៧ឆ្នាំ ដែលមានការអញ្ជេីញចូលរួមពីសំណាក់ឯកឧត្តម លោកជំទាវ លោក លោកស្រី ប្រធានមន្ទីរ អង្គភាពពាក់ព័ន្ធ កងកម្លាំងប្រដាប់អាវុធគ្រប់លំដាប់ថ្នាក់ ព្រះសង្ឃ អភិបាលក្រុង-ស្រុក សិស្ស និស្សិត តាជីយាយជី បានចូលរួមធ្វេីឡេីងនៅសាលប្រជុំសាលាខេត្តបន្ទាយមានជ័យ នៅថ្ងៃចន្ទ ១រោច ខែអស្សុជ ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី១៤ ខែតុលា ឆ្នាំ២០១៩។
នាឱកាសនោះ ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ក៏បានអាននូវជីវប្រវត្តិសង្ខេបរបស់ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប៧ឆ្នាំ នៃការយាងសោយទិវង្គត។ បន្ទាប់មកឯកឧត្ដម គណៈអធិបតី រួមនឹងមន្ត្រីរាជការ កងកម្លាំង សិស្ស និស្សិត ស្តាប់ព្រះសង្ឃសូត្រមន្ត បង្សុកូលឧទ្ទិសថ្វាយនូវព្រះរាជកុសលផលបុណ្យ ជូនចំពោះវិញ្ញណក្ខន្ធ ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ និងឯកភាពជាតិខ្មែរ ។
ជាមួយគ្នានោះឯកឧត្តម អ៊ុ រាត្រី អភិបាលនៃគណៈអភិបាលខេត្តក៏បានបួងសួង ដល់គុណបុណ្យព្រះរតនត្រ័យ ថ្វាយព្រះរាជកុសល ព្រះវិញ្ញាណក្ខន្ធ ព្រះករុណា ព្រះមហាវីរក្សត្រ នរោត្តម សីហនុ ព្រះវររាជបិតាជាតិខ្មែរ ព្រះបរមរតនកោដ្ឋ សូមបានយាងទៅសោយព្រះបរមសុខ ក្នុងសុគតិភព។ និងសូមឱ្យព្រះវិញ្ញាណក្ខន្ធ ដ៏ស័ក្កិសិទ្ធិរបស់ព្រះអង្គតាមជួយប្រោសប្រទានសាធុការពរជ័យ ដល់ទឹកដីនៃព្រះរាជាណាចក្រកម្ពុជា និងជាប្រជារាស្រ្តខ្មែរទូទាំងប្រទេស ប្រកបដោយវឌ្ឍនភាព វិបុលសុខ និងសុខកេក្សាន្ត រុងរឿងជាយូរអង្វែងតរៀងទៅ។
ចុងបញ្ចប់គណៈអធិបតីក៏បានចែកអំណោយជូនតាជីយាយជីដែលបានចូលរួមផងដែរ៕
ប្រភពៈ រដ្ឋបាលខេត្តបន្ទាយមានជ័យ
