ថ្ងៃចន្ទ ទី១៤ ខែតុលា ឆ្នាំ២០១៩ ឯកឧត្តម វ៉ា ថន អភិបាលខេត្តក្រចេះ និងជាប្រធានគណៈកម្មាធិការគ្រប់គ្រងគ្រោះមហន្ដរាយខេត្ត និងមន្ទីរអង្គភាពជុំវិញខេត្ត អញ្ជើញប្រគល់ស្រូវពូជសែនក្រអូបជូនដល់ប្រជាកសិករនៅឃុំបុសលាវ ស្រុកចិត្របុរី ដើម្បីយកទៅសាប់ព្រោះឡើងវិញក្រោយទឹកជំនន់ទន្លេលិចខូចខាតដែលមានផ្ទៃដីប៉ះពាល់ដំណាំស្រូវចំនួន៨៥,៥៦ហិកតា ស្មើនិង១៣៨គ្រួសារ ត្រូវបែងចែកស្រូវពូជចំនួន ៨៦០០គីឡូក្រាម ពិធីនេះធ្វើឡើងនៅបរិវេណវត្តបុសាលាវ ។
ឯកឧត្តម វ៉ា ថន មានប្រសាសន៍ថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី សម្តេចតែងតែយកចិត្តទុកដាក់គិតចំពោះសុខទុក្ខរបស់ប្រជាពលរដ្ឋនូវគ្រប់កាលៈទេសៈ ក៏ដូចជាតាមរយៈឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានចុះតាមដានអំពីស្ថានភាពទឹកជំនន់ និងស្ថានភាពរស់នៅរបស់បងប្អូនផ្ទាល់ ដើម្បីជួយដោះស្រាយនូវរាល់ទុក្ខលំបាក តម្រូវការខ្វះខាត និងបញ្ហប្រឈមនានាបានទាន់ពេវេលា ។ នេះសបញ្ជាក់ ឲ្យឃើញកាន់តែច្បាស់ពីការយកចិត្តទុកដាក់ខ្ពស់ ពីសំណាក់ថ្នាក់ដឹកនាំជាន់ខ្ពស់ នៃរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។
ឯកឧត្ដម អភិបាលខេត្ត ក៏បានជំរុញដល់អាជ្ញាធរមានសមត្ថកិច្ចតាមដានបង្ហាត់បង្រៀនបច្ចេកទេសដាំដុះពូជស្រូវ និងពិនិត្យប្រភពទឹក រក្សាទឹកសម្រថាប់ផ្គត់ផ្គង់ស្រូវឲ្យបានគ្រប់គ្រាន់ និងបានអំពាវនាវអោយបងប្អូនប្រជាពលរដ្ឋទាំងអស់អោយខិតខំបន្ថែមទៀត ក្រៅពីការស្ដារឡើងវិញនៅដំណាំស្រូវ គឺត្រូវដាំដំណាំ បន្លែបង្ការបន្ថែមនៅផ្ទៃដីក្បែរៗភូមិដ្ឋាន ដោយប្រើប្រាស់ជីធម្មជាតិដែលមានស្រាបនៅក្នុងភូមិ ដែលវាជាការរួមចំណែកបង្កើនជីវភាពរបស់ខ្លួន និងដើម្បីកាត់បន្ថយការចំណាយ ទៅទិញរបស់ទីផ្សារដែលសង្ស័យថាមានជាតិគីមីទៀតផង ។
ប្រភពៈ រដ្ឋបាលខេត្តក្រចេះ