ថ្ងៃចន្ទ ១រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែតុលា ឆ្នាំ២០១៩នេះ ក្រសួងសង្គមកិច្ចអតីតយុទ្ធជន និងយុវនីតិសម្បទា សហការជាមួយរដ្ឋបាលខេត្តក្រចេះ បើកសិក្ខាសាលាផ្សព្វផ្សាយគោលនយោបាយជាតិ ស្តីពីមនុស្សវ័យចាស់ (២០១៧-២០៣០) នៅសាលាមហោស្រពខេត្ត ក្រោមអធិបតីភាពឯកឧត្តម ប៉ែន លីណាត អភិបាលរងខេត្តក្រចេះ និងដោយមានការចូលរួមពីលោក លោកស្រី អភិបាលក្រុងស្រុក មន្ទីរ-អង្គភាពជុំវិញខេត្ត  មេឃុំ ចៅសង្កាត់ ថ្នាក់ដឹកនាំសមាគមមនុស្សចាស់ និងមន្ត្រីនៃមន្ទីរអង្គភាពក្នុងខេត្ត សរុបប្រមាណជាង១៤០នាក់។

      ឯកឧត្តម ប៉ែន លីណាត អភិបាលរងខេត្តមានប្រសាសន៍ថា ៖ គោលនយោបាយជាតិរបស់រាជរដ្ឋាភិបាលកម្ពុជា ស្តីពីមនុស្សវ័យចាស់ (២០១៧- ២០៣០) ពិសេសគណៈកម្មាធិការជាតិកម្ពុជា ដើម្បីមនុស្សចាស់ ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឆ្លើយតបចំពោះគុណបំណាច់មិនអាចកាត់ថ្លៃបាន ចំពោះមនុស្សចាស់ ជាធនធានដ៏មានសារសំខាន់មិនចេះរីងស្ងួត ធ្វើការពលីកម្មគ្រប់បែបយ៉ាង ដើម្បីបង្កើត និងថែរក្សានូវសមិទ្ធិផលជាតិនានា ដែលបុព្វបុរសបានបន្សល់ទុកសម្រាប់មនុស្សជំនាន់ក្រោយ ហេតុនេះទើបយើងចាត់ទុកថា មនុស្សចាស់ គឺជាគ្រឹះនៃបញ្ញាញាណ ជាគតិបណ្ឌិត ជាសម្បត្តិវប្បធម៌ និងជាមរតកសម្រាប់យើងទាំងអស់គ្នា។

      ឯកឧត្តមបានបន្តថា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោ ហ៊ុន សែន បានបន្តការគិតគូរទៅលើមនុស្សចាស់ ដែលបានកំណត់ច្បាស់ក្នុងគោលនយោបាយជាតិ និងកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ និងជាចក្ខុវិស័យនៃគោលនយោបាយជាតិ គឺធានាថាមនុស្សចាស់អាចចូលរួមយ៉ាងពេញលេញ ដោយសេរីនឹងមានសេចក្តីថ្លៃថ្នូរ ក្នុងសកម្មភាពគ្រួសារ សហគម សេដ្ឋកិច្ចសង្គម សាសនា និងនយោបាយ ហើយធានាថាមនុស្សវ័យក្មេងនឹងត្រូវបណ្ដុះបណ្ដាលចំណេះដឹងបានល្អប្រសើរ ដែលអាចជួយពួកគាត់គ្រប់គ្រងដំណើរជីវិតរស់នៅ ដែលបង្កើតផលផ្លែផ្កាប្រកបដោយសុខភាពល្អ។ មនុស្សពេលចូលដល់វ័យចាស់ បញ្ញាស្មារតី និងសុខភាពតែងតែចុះខ្សោយជាបណ្ដើរៗកាន់តែចាស់ ភាពងាយរងគ្រោះកាន់តែកើតមាន ដែលត្រូវការគាំទ្រសេវាសុខមាលភាពជាប្រចាំ ដើម្បីឱ្យមានភាព រឹងមាំ និងអាយុយឺនយូរ ស្ថានភាពជាក់ស្ដែងនាពេលបច្ចុប្បន្ន មនុស្សចាស់ភាគច្រើនរស់នៅជាមួយក្រុមគ្រួសារកូន ចៅ ឬជាមួយសាច់ញាតិ ហើយមួយចំនួនទៀតកំព្រាឯកោ ក៏រស់នៅតាមវត្តអារាម ដោយទទួលបានការឧបត្ថម្ភពីព្រះសង្ឃ និងពុទ្ធបរិស័ទជិតឆ្ងាយ និងមនុស្សចាស់ដូចគ្នា៕

ប្រភព៖ រដ្ឋបាលខេត្តក្រចេះ