ថ្ងៃអង្គារ ទី៣០ ខែកក្កដា ឆ្នាំ២០១៩ ឯកឧត្តម វ៉ា ថន អភិបាលខេត្តក្រចេះ បានអញ្ជើញចូលរួមក្នុងពិធីចែកវិញ្ញាបន បត្រសម្គាល់ម្ចាស់អចលនវត្ថុជូនដល់សម្បទានិកចំនួន១៧៦គ្រួសារ ស្មើនឹង២៥៨ប័ណ្ណ នៅឃុំដារ ស្រុកចិត្របុរី ខេត្តក្រចេះ ក្រោមអធិបតីឯកឧត្តម សរ សុវណ្ណ រដ្ឋលេខាធិការ តំណាងឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅក្នុងបរិវេណអាគារសហគមន៍អូរគគីសែនជ័យ។
ឯកឧត្តម វ៉ា ថន អភិបាលខេត្តក្រចេះ មានប្រសាសន៍ថា រាជរដ្ឋាភិបាលកម្ពុជា ជាពិសេសក្រសួងមហាផ្ទៃ ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ និងធនាគារពិភពលោក បានកំណត់យកខេត្តក្រចេះជាខេត្តគោលដៅក្នុងការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ទាំងជំហានសាកល្បង (LASED l) ចាប់តាំងពីឆ្នាំ២០០៨ និងជំហាន២ (LASED II) ចាប់ពីឆ្នាំ២០១៦ មកដល់បច្ចុប្បន្ន។ រដ្ឋបាលខេត្តក្រចេះសម្រេចជ្រើសរើសយកស្រុកគោលដៅចំនួនពីរ គឺ ស្រុកចិត្របុរី ដែលមានឃុំគោលដៅចំនួន៤ គឺ ឃុំសំបុក ឃុំចង្រ្កង់ ឃុំដារ និងឃុំថ្មី និងស្រុកព្រែកប្រសព្វ មានឃុំគោលដៅចំនួន១ គឺ ឃុំចំបក់។ ឯកឧត្តម បន្តថា នៅក្នុងឆ្នាំ២០១៩នេះ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ជំហាន២ បានបន្តសកម្មភាពលេីឃុំគោលដៅទាំង៥ ដោយទទួលសម្បទានិកឱ្យចូលទៅរស់នៅអចិន្ត្រៃយ៍ និងប្រកបរបរកសិកម្មចំនួន ២.១១៩គ្រួសារ។ ជាលទ្ធផលរហូតមកដល់ពេលបច្ចុប្បន្នមានសម្បទានិករស់នៅអចិន្ត្រៃយ៍ និងប្រកបរបរកសិកម្មចំនួន ៧៥៧គ្រួសារ រស់នៅមិនអចិន្ត្រៃយ៍ចំនួន ៩៧២គ្រួសារ និងមិនទាន់ចូលមករស់នៅចំនួន ៣៩០គ្រួសារ ហើយថ្ងៃនេះឃុំដារ ដែលរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុជូនសម្បទានិកលេីផ្ទៃដីសម្បទានសង្គមកិច្ចទំហំ ៥៧២,៣៧ហិកតា ដែលបានចុះបញ្ជីជាដីឯកជនរបស់រដ្ឋកាលពីថ្ងៃទី២៦ ខែធ្នូ ឆ្នាំ២០១០ ផ្ទៃដីដែលត្រូវចែកជូនប្រជាពលរដ្ឋមានផ្ទៃដីលំនៅឋានទំហំ ២៩,៦០ហិកតា និងផ្ទៃដីកសិកម្មទំហំ ៣៨៦ហិកតា។
ឯកឧត្តម សរ សុវណ្ណ រដ្ឋលេខាធិការ តំណាងឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានសម្តែងក្តីរីករាយ និងអបអរសាទរចំពោះសម្បទានិកទាំងអស់ ដែលបានទទួលវិញ្ញាបនបត្រសម្គាល់ម្ចាស់អចលនវត្ថុនៅពេលនេះ។ ឯកឧត្តមបានមានប្រសាសន៍បន្ថែមថា ក្រោយពេលដែលប្រជាពលរដ្ឋបានទទួលដីសង្គមកិច្ចពីរាជរដ្ឋាពិបាល តាមរយៈគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) នេះ ប្រជាពលរដ្ឋមានដីសម្រាប់សង់ លំនៅឋាន និងដីសម្រាប់បង្កបង្កើនផល ដើម្បីបង្កើនជីវភាពរស់នៅរបស់ខ្លួន និងកែប្រែមុខមាត់ថ្មី។ទន្ទឹមនឹងនេះ ឯកឧត្តមមានប្រសាសន៍ថា ការទទួលបានប័ណ្ណកម្មសិទ្ធិដីធ្លីនាពេលនេះ បងបង្អូននឹងកាន់តែមានសុវត្ថិភាពក្នុងការកាន់កាប់ និងប្រើប្រាស់ដីដែលបានទទួលពីរាជរដ្ឋាភិបាល និងជាមរតកសម្រាប់បន្តដល់កូនចៅ។ ចំណុចមួយទៀតវាក្លាយទៅជាទុនដល់បងប្អូនដែលជាទុនផ្តល់នូ វប្រាក់ចំណូលទៀងទាត់ តាមរយៈការដាំដុះ និងភ្ញាស់ចិញ្ចឹមរបស់បងប្អូនប្រជាពលរដ្ឋដែល ជាសម្បទានិក។
ឆ្លៀតឱកាសនោះ ឯកឧត្តម សរ សុវណ្ណ ក៏បានសំណូមពរដល់ប្រជាពលរដ្ឋដែលបានទទួលវិញ្ញាបនបត្រ សម្គាល់ម្ចាស់អចលនវត្ថុនៅពេលនេះ កុំលក់ដូរ ឬដាក់បញ្ចាំ ព្រោះវាអាចនឹងធ្វើឱ្យប៉ះពាល់ដល់ជីវភាព រស់នៅរបស់ប្រជាពលរដ្ឋនៅពេលក្រោយ ផ្ទុយទៅវិញ សម្បទានិកទាំងអស់ត្រូវរួមចំណែកប្រើប្រាស់ដី ដែលទទួលបានក្នុងការរស់នៅ និងបង្កបង្កើនផលឱ្យមានជីវភាពប្រសើរឡើង ដើម្បីគម្រោងមានមូលដ្ឋាន ក្នុងការស្នើសុំសម្បទានហិរញ្ញប្បទាន សម្រាប់អនុវត្តគម្រោងនេះនៅតាមទីតាំងផ្សេងទៀត ដែលមានប្រជា ពលរដ្ឋក្រីក្រគ្មានដីធ្លី និងមានដីធ្លីតិចតួចកំពុងត្រូវការដីសម្បទានសង្គមកិច្ចបន្ថែមពីរាជរដ្ឋាភិបាល៕ រម្យ
ប្រភព៖ រដ្ឋបាលខេត្ត
