ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង ដោយមានការចូលរួមពីលោកជំទាវ នេត ភូម៉ារី អនុរដ្ឋលេខាធិការក្រសួងវប្បធម៌ និងវិចិត្រសិល្បៈ នារសៀលថ្ងៃអង្គារ ទី៣០ ខែកក្កដា ឆ្នាំ២០១៩នេះ បានចុះសួរសុខទុក្ខ និងនាំយកថវិការបស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រី្តក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ដើម្បីឧបត្ថម្ភដល់កម្មកររោងចក្រដែលបានជួបគ្រោះថ្នាក់ចរាចរណ៍រងរបួសធ្ងន់ចំនួន១៨នាក់ កាលពីព្រឹកមិញនៅភូមិកំពង់រទេះ ឃុំពពែត ស្រុកស្វាយទាប ខេត្តស្វាយរៀង ដែលកំពុងសម្រាកព្យាបាលនៅមន្ទីរពេទ្យខេត្តស្វាយរៀង។
ឯកឧត្តម ម៉ែន វិបុល អភិបាលខេត្តបានសម្តែងនូវការសោកស្តាយចំពោះឧបទ្ទវហេតុនេះដែលបានកើតឡើងបណ្ដាលឲ្យកម្មករ កម្មការិនី ស្លាប់ ចំនួន២នាក់ និងរងរបួសធ្ងន់ស្រាល៣០នាក់។ ឯកឧត្តមអភិបាលខេត្តក៏បានធ្វើការផ្តាំផ្ញើដល់ក្រុមគ្រូពេទ្យឲ្យមានការយកចិត្តទុកដាក់បំផុតក្នុងការពិនិត្យ ព្យាបាល និងតាមដានឲ្យបានដិតដល់ពីស្ថានភាពរបស់អ្នករងរបួសដែលកំពុងសម្រាកព្យាបាលនាពេលនេះ។ ព្រមជាមួយគ្នានោះ ឯកឧត្តម ម៉ែន វិបុល អភិបាលខេត្តក៏បានអញ្ជើញចុះសួរសុខទុក្ខ និងនាំយកថវិកាឧបត្ថម្ភដល់អ្នករងរបួសស្រាល ចំនួន ១២នាក់ ដែលកំពុងសម្រាកព្យាបាលនៅមន្ទីរពេទ្យបង្អែកជីភូ និងចូលបុណ្យដល់គ្រួសារសពចំនួន០២គ្រួសារ ក្នុង១គ្រួសារទទួលបានថវិកា១.១០០.០០០រៀល និងទេយ្យទានមួយចំនួនទៀតផងដែរ៕ គឹមអាន
ប្រភព៖ រដ្ឋបាលខេត្តស្វាយរៀង
