នៅសាលប្រជុំរដ្ឋបាលខេត្តកំពង់ឆ្នាំង បានបើកកិច្ចប្រជុំផ្សព្វផ្សាយសេចក្ដីស្ដីពី ការរៀបចំ និងកសាង កម្មវិធីវិនិយោគ បីឆ្នាំរំកិល(២០២០-២០២២) ក្រោមអធិបតីភាព លោក អម សុភា អភិបាលរងខេត្តកំពង់ឆ្នាំង នៅព្រឹកថ្ងៃទី២៩ ខែកក្កដា ឆ្នាំ២០១៩ ដោយមានការអញ្ជើញចូលរួមពី សមាជិក សមាជិកា ក្រុមប្រឹក្សាខេត្ត នាយករងរដ្ឋបាលសាលាខេត្ត ក្រុមការងារកសាងផែនការខេត្ត ក្រុង ស្រុក មន្ទីរ អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។

      ទន្ទឹមនឹងនោះ លោក អម សុភា ក៏បានផ្សព្វផ្សាយបន្ថែមអំពីច្រកចេញចូលតែមួយដោយបានគូសបញ្ជាក់ថា៖ នៅថ្នាក់ខេត្ត គឺអង្គភាពច្រកចេញ ចូលតែមួយខេត្តកំពង់ឆ្នាំង ដែលមានអគារនៅក្នុងបរិវេណសាលាខេត្តកំពង់ឆ្នាំង សម្រាប់ថ្នាក់ ក្រុង ស្រុក គឺការិយាល័យ ច្រកចេញ ចូលតែមួយ ហើយការិយាល័យ ច្រកចេញ ចូលតែមួយនេះ មានពីរ គឺនៅក្នុងសាលាក្រុង កំពង់ឆ្នាំង និងសាលាស្រុកកំពង់ត្រឡាច។

      ក្នុងនោះ លោក អភិបាលរង ក៏បានលើកឡើងបន្ថែមទៀតថា រាជរដ្ឋាភិបាលកម្ពុជា បានបង្កើតឱ្យមានយន្ដការ ច្រកចេញ ចូលនេះ ឡើងក្នុងគោលបំណង គឺដើម្បីបង្ខិតសេវា ឱ្យនៅជិតប្រជាពលរដ្ឋ ពោលគឺបង្កភាព ងាយស្រួលដល់ប្រជាពលរដ្ឋក្នុងការមកទទួលសេវាផ្សេងៗនៅក្នុងកន្លែង តែមួយនៅក្នុងដែន សមត្ថកិច្ចរបស់ខ្លួន៕ រតនា

ប្រភព៖ រដ្ឋបាលខេត្តកំពង់ឆ្នាំង