រដ្ឋបាលខេត្តស្វាយរៀង បានរៀបចំកិច្ចប្រជុំរវាងសមាគមមិត្តភាព កម្ពុជា-វៀតណាម និងសមាគមមិត្តភាពវៀតណាម-កម្ពុជា ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ប្រធានសមាគមមិត្តភាពកម្ពុជា-វៀតណាម នាព្រឹកថ្ងៃចន្ទ ទី២៩ ខែកក្កដា ឆ្នាំ២០១៩នេះ នៅសាលប្រជុំធំសាលាខេត្ត ដោយមានការ អញ្ជើញចូលរួមដោយ ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង ព្រមទាំងថ្នាក់ដឹកនាំខេត្ត និងប្រតិភូសមាគម នៃប្រទេសទាំងពីរជាច្រើនរូបទៀត។
លោកជំទាវកិត្តិសង្គហបណ្ឌិត ម៉ែន សំអន បានមានប្រសាសន៍ថា ក្នុងនាម ប្រធានសមាគមមិត្តភាពកម្ពុជា-វៀតណាម សូមអគុណចំពោះ ឯកឧត្តម វូ ម៉ៅ ប្រធានសមាគមមិត្តភាពវៀតណាម-កម្ពុជា ដែលបានដឹកនាំប្រតិភូមកចូលរួមកិច្ចប្រជុំនាពេលនេះ ស្របតាមអនុស្សារណៈយោគយល់ រវាងសមាគមមិត្តភាពទាំងពីរដែលបានចុះហត្ថលេខាកាលពីថ្ងៃទី១៧ ខែធ្នូ ឆ្នាំ២០១៥ ដែលត្រូវប្តូរវេនធ្វើជាម្ចាស់ផ្ទះនៅខេត្តស្វាយរៀងនាពេលនេះ ដើម្បីទស្សនកិច្ច និងប្រជុំបូកសរុបការងារ និងលើកទិសដៅការងារ សម្រាប់កិច្ចសហប្រតិបត្តិការរវាងសមាគមមិត្តភាពនៃប្រទេសទាំងពីរ។ លោកជំទាវកិត្តិសង្គហបណ្ឌិតបានបន្តថា តាមរយៈសមាគមនៃប្រទេសទាំងពីរ គឺជាស្ពានក្នុងការភ្ជាប់នូវចំណងទាក់ទងមិត្តភាពនៃប្រទេសទាំងពីរឲ្យកាន់តែមានភាពជិតស្និតបន្ថែមទៀត ស្របតាមប្រសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺត្រូវខិតខំពង្រឹងនូវកិច្ចសហប្រតិបត្តិការឲ្យកាន់តែរឹងមាំ ឈរលើផលប្រយោជន៍ជាតិ នៃប្រទេសយើងទាំងពីរដោយត្រូវ ផ្សព្វផ្សាយជូនដល់ប្រជាពលរដ្ឋនៅ តាមបណ្តាខេត្តជាប់ព្រំដែនជាមួយគ្នា ដោយធ្វើឲ្យប្រសើរឡើងនូវសហប្រតិបត្តិការទាំងក្នុងវិស័យអប់រំ វិស័យសង្គមកិច្ច វិស័យសេដ្ឋកិច្ច វិស័យសុខាភិបាល និងវិស័យផ្សេងៗទៀត ដើម្បីធ្វើឲ្យមិត្តភាពកិច្ចសហប្រតិបត្តិការនៃប្រទេសទាំងពីរកាន់តែមានទំនាក់ទំនងល្អ និងឆ្លើយតបទៅនឹងទំនុកចិត្តថ្នាក់ដឹកនាំនៃប្រទេសកម្ពុជា-វៀតណាម។ ជាងនេះទៅទៀតត្រូវលើកទឹកចិត្ដដល់ថ្នាក់មូលដ្ឋាននៃប្រទេសទាំងពីរ ជាពិសេសរវាងខេត្ដ ស្រុក និងឃុំដែលមាន ព្រំដែនជាប់គ្នារួមគ្នាពង្រឹង កិច្ចសហការក្នុងក្របខណ្ឌ សមាគម មិត្ដភាព ដើម្បីរិតចំណងសាមគ្គីភាព មិត្ដភាពសហប្រតិបត្ដិការ និងការប្រាស្រ័យទាក់ទងគ្នាលើគ្រប់វិស័យក្នុងនោះយកចិត្ដទុកដាក់រក្សាការពារ សន្ដិសុខ សណ្ដាប់ធ្នាប់នៅតាមបណ្តោយ ព្រំដែនអោយបានល្អប្រសើរ៕ គឹមអាន
ប្រភព៖ រដ្ឋបាលខេត្តស្វាយរៀង