ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការត្រួតពិនិត្យគ្រឿងញៀនខេត្តកំពង់ចាម បានជំរុញឲ្យប្រជាពលរដ្ឋ និងប្អូនៗសិស្សានុសិស្សផ្តល់កិច្ចសហការចូលរួមទប់ស្កាត់ គ្រឿងញៀន ជាពិសេសសូមឲ្យ ថ្នាក់ដឹកនាំអាជ្ញាធរមូលដ្ឋាន ក្រុមប្រឹក្សា ឃុំ សង្កាត់ ទាំងអស់ត្រូវចូលរួម ផ្ដល់កិច្ចសហ​ប្រតិបត្តិការណ៍ ទប់ស្កាត់ បង្ក្រាបគ្រឿងញៀន ដើម្បីចូលរួមបំរើប្រជាពលរដ្ឋផងដែរ។ ឯកឧត្តម បានលើកឡើងបែបនេះនាព្រឹកថ្ងៃទី ២៤ ខែ​កក្កដា ឆ្នាំ២០១៩ នៅក្នុងពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ក្រោម​ប្រធានបទសុខភាព​ដើម្បី​យុត្តិធម៌  យុត្តិធម៌ដើម្បីសុខភាព ក្រោមអធិបតីភាព ឯកឧត្តម  អ៊ុន ចាន់ដា អភិបាល ​នៃគណៈអភិបាលខេត្តកំពង់ចាម នៅ​បរិវេណច្រមុះជ្រូកតាមបណ្តោយផ្លូវជាតិលេខ៦ ស្ថិតនៅក្នុង​ភូមិប៉ាណា ឃុំសូទិព្វ ស្រុកជើងព្រៃ ខេត្តកំពង់ចាម  ដោយមានការអញ្ជើញចូលរួមពីមន្ត្រីរាជការ មន្ទីរ អង្គភាព​ពាក់ព័ន្ធជុំវិញខេត្ត និងកងកម្លាំងប្រដាប់អាវុធ។
     ឯកឧត្តម អ៊ុន ចាន់ដា បានលើកឡើងបន្ថែមអំពីផលប៉ះពាល់នៃគ្រឿងញៀន ព្រមទាំងបានអំពាវនាវដល់​ប្រពលរដ្ឋជាពិសេសយុវវ័យគ្រប់រូបត្រូវជៀសឲ្យឆ្ងាយពីគ្រឿងញៀនដែលធ្វើឲ្យបាត់បង់សេដ្ឋកិច្ចគ្រួសារ បាត់​បង់កិត្តិយស ស្មារតី សុខភាព ដូច្នេះកុំយកខ្លួនបៀតជាមួយសារធាតុញៀន និងធ្វើការផ្តល់ព័ត៌មានពីសកម្មភាព​ដែលមានការប្រើប្រាស់គ្រឿងញៀន ចំពោះអ្នកមានបំណងចង់ព្យាបាល ផ្តាច់សារធាតុញៀន សូមនាំពួកគាត់ទៅ​កាន់មន្ទីរពេទ្យ ឬនៅតាមមណ្ឌលសុខភាព ដែលមានថ្នាំបន្សាបផ្តាច់សារធាតុញៀន​ដោយឥត​គិតថ្លៃក្នុង​មូលដ្ឋាន។
     សូមបញ្ជាក់ដែរថា សមត្ថកិច្ចបាននាំយកគ្រឿងញៀន ដែលបង្ក្រាបបាននាពេលកន្លងមកដុតកម្ទេចបំផ្លាញ ចោលសរុបចំនួន ៧៨១.៦៧ក្រាម ស្មើនឹង ១២០ករណី នៅកន្លែងប្រារព្ធពិធីនេះតែម្តង៕ គឹមអាន

ប្រភព៖ រដ្ឋបាលខេត្តកំពង់ចាម