នាព្រឹកថ្ងៃពុធ ទី២៦ ខែមិថុនា ឆ្នាំ២០១៩នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង បានអញ្ជើញចុះសួរសុខទុក្ខ និងចែកអំណោយមនុស្សធម៌ដល់គ្រួសាររងគ្រោះដោយសារខ្យល់កន្ត្រាក់កាលពីល្ងាចថ្ងៃទី២១ ខែមិថុនា ឆ្នាំ២០១៩កន្លងទៅ នៅស្រុករមាសហែក ខេត្តស្វាយរៀង ដែលប្រារព្ធធ្វើចំនួន ២ទីតាំង ទីតាំងទី១ នៅក្នុងបរិវេណវត្តស្វាយទន្ទឹម ដែលមានប្រជាពលរដ្ឋរងគ្រោះមកពីឃុំត្រពាំងស្តៅ និងឃុំអង្គប្រស្រែ សរុប ៧៩៤គ្រួសារ និងទីតាំងទី២ នៅបរិវេណវត្តអណ្តូងពោធិ៍ ដែលមានប្រជាពលរដ្ឋរងគ្រោះមកពីឃុំអណ្តូងពោធិ៍ និងឃុំដូង សរុប ៤៩៧គ្រួសារ។
ឯកឧត្ដម ម៉ែន វិបុល បានពាំនាំនូវប្រសាសន៍ផ្ដាំផ្ញើសួរសុខទុក្ខ និងសេចក្ដីនឹករលឹកពីសំណាក់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋ ដែលជានិច្ចកាលសម្ដេច លោកតែងតែគិតគូរពីសុខទុក្ខ និងជំរុញឲ្យមានការដោះស្រាយបញ្ហានានារបស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង ។ឯកឧត្តមបានថ្លែងនូវការសោកស្តាយចំពោះការខូចទ្រព្យសម្បត្តិដ៏ដូចជាផ្ទះរបស់បងប្អូនដែលរងគ្រោះដោយសារខ្យល់កន្ត្រាក់ជាដើម ។ ឯកឧត្ដមក៏បានផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ពីសុវត្ថិភាពផ្ទាល់ ខ្លួន និងក្រុមគ្រួសារ ដោយត្រូវបិទទូរស័ព្ទ រកកន្លែងដែលមានសុវត្ថិភាព នៅពេលមានភ្លៀងធ្លាក់ ដែលងាយនឹងបង្កឲ្យមានគ្រោះថ្នាក់ដោយសាររន្ទះ ឬខ្យល់កន្ត្រាក់ ត្រូវមើលថែទាំកូនចៅឲ្យបានល្អ ជាពិសេសក្មេងតូចៗកុំឲ្យលេងទឹកដែលអាចបង្កឲ្យមានគ្រោះថ្នាក់ដោយករណីលង់ទឹក ត្រូវថែរក្សាសុខភាព ត្រូវបង្ការកាពារការឆ្លងជំងឺគ្រុនឈាមដែលកើតចេញពីមូសខ្លាខាំ ត្រូវគេងក្នុងមុង ជាពិសេសក្មេងតូចៗ និងជួយអប់រំណែនាំកូនចៅឲ្យគោរពច្បាប់ចរាចរណ៍ និងចៀសឲ្យឆ្ងាយពីគ្រឿងញៀនគ្រប់ប្រភេទ ក្នុងនោះត្រូវនាំគ្នាដាំដើមឈើឲ្យបានច្រើននៅវិញផ្ទះដើម្បីការពារខ្យល់ និងបាតុភូតធម្មជាតិដែលកើតឡើងជាយថាហេតុផ្សេងៗ ផងដែរ។
សូមបញ្ជាក់ថា អំណោយដែលបានចែកជូនរួមមាន៖
- គ្រួសាររងគ្រោះធ្ងន់ធ្ងរ ៤៨គ្រួសារ ក្នុង ១គ្រួសារ ទទួលបាន អង្ករ ៣០គ.ក្រ មី ១កេស ទឹកស៊ីអ៊ីវ ៦ដប ត្រីខ ១០កំប៉ុង ធុងទឹកជ័រ ១ ឆ្នាំងបាយ-សម្ល ២ ក្រណាត់កៅស៊ូតង់ ១ កន្ទេលបត់ ១ ឃីត ១ កញ្ចប់ (មុង ភួយ សារុង ក្រមា) និងថវិកា ២០០.០០០ រៀល ។
-គ្រួសាររងគ្រោះមធ្យម ៧៨៥គ្រួសារ ក្នុង ១គ្រួសារ ទទួលបាន អង្ករ ៣០គ.ក្រ មី ១កេស ទឹកស៊ីអ៊ីវ ៦ដប ត្រីខ ១០កំប៉ុង កន្ទេលបត់ ១ ឃីត ១ កញ្ចប់ (មុង ភួយ សារុង ក្រមា) និងថវិកា ៥០.០០០ រៀល ។
-គ្រួសាររងគ្រោះតិចតួច ៤៥៨គ្រួសារ ក្នុង ១គ្រួសារ ទទួលបានថវិកា ៥០.០០០រៀល។
ព្រមជាមួយគ្នានោះឯកឧត្តម សៅ សុខា ប្រធានក្រុមការងារចុះជួយស្រុករមាសហែក បានឧត្ថម្ភបន្ថែមនូវថវិកា ក្នុង១គ្រួសារទទួលបាន ១០.០០០៛ ផងដែរ៕ គឹមអាន
ប្រភព៖ រដ្ឋបាលខេត្តស្វាយរៀង