ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានជម្រុញបែបនេះនៅថ្ងៃទី២៥ ខែមិថុនា ឆ្នាំ២០១៩ ក្នុងពិធីសម្ពោធដាក់អោយដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋ នៃរដ្ឋបាលសាលាស្រុកកំពង់ត្រឡាច ដោយមានការចូលរួមពីមន្រ្តីនិងប្រជាពលរដ្ឋចំនួន៥២២នាក់។

      ឯកឧត្តម ឈួរ ច័ន្ទឌឿន បានមានប្រសាសន៍បន្តថាៈមន្ត្រីរាជការទាំងអស់ត្រូវចាត់ទុកខ្លួនជាអ្នកបម្រើប្រជាពលរដ្ឋគឺមិនមែនម្ចាស់លើប្រជាពលរដ្ឋនោះទេគឺត្រូវខិតខំផ្តល់សេវាធារណៈជូនប្រជាពលរដ្ឋអោយបានទាន់ពេលវេលាស្របតាមនិតិវិធីច្បាបបានកំណត់់តាមជំនាញនីមួយៗ ជាពិសេសត្រូវមានភាពទទួលខុសត្រូវ  មានសាមគ្គី រក្សាភាពថ្លៃថ្នូរ ក្រមសីលធម៌ល្អ ក្នុងនាមជាមន្ត្រីរាជការ។

      ឯកឧត្តម ឈួរ ច័ន្ទឌឿន បានមានប្រសាសន៍បញ្ជាក់ថា ការសម្ពោធដាក់អោយដំណើរការ ការិយាល័យច្រកចេញចូលតែមួយ និងការិយាល័យប្រជាពលរដ្ឋ នៃរដ្ឋបាលសាលាស្រុកកំពង់ត្រឡាច ដើម្បីលើកកម្ពស់ ប្រសិទ្ធភាព តម្លាភាព និង គណនេយ្យភាពនៃការផ្តល់សេវារដ្ឋបាលថ្នាក់ក្រោមជាតិតាមរយៈការប្រមូលផ្តុំសេវារដ្ឋបាលនៅលើវិស័យនានា នៅកន្លែងតែមួយ ក្នុងការបង្កភាពងាយស្រួល និងធ្វើអោយទាន់ពេលវេលាទៅនឹងស្របតាមតម្រូវការនិងសំណូមពរចាំបាច់របស់ប្រជាពលរដ្ឋ៕ រតនា

ប្រភព៖ រដ្ឋបាលខេត្តកំពង់ឆ្នាំង