នៅព្រឹកថ្ងៃសុក្រ ៤ រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ២១ ខែ មិថុនា ឆ្នាំ ២០១៩នេះ ខេត្តតាកែវ បើកការដ្ឋានក្រាលកៅស៊ូប្រមាណ៨គីឡូម៉េត្រ ដែលឆ្លងកាត់៣ឃុំរបស់ស្រុកព្រៃកប្បាស់ និងស្រុកកោះអណ្ដែត ក្រោមអធតីភាព ឯកឧត្តម អ៊ូច ភា អភិបាលខេត្តតាកែវ។
ឯកឧត្តម អ៊ូច ភា បានមានប្រសាសន៍ចំពោះមុខបងប្អូនប្រជាពលរដ្ឋ និងអាជ្ញាធស្រុក ភូមិ ឃុំ ដែលបានចូលរួមនៅក្នុងពិធីសម្ភោធបើកការដ្ឋាននោះថា រាជរដ្ឋាភិបាលបានប្រឹងប្រែងគ្រប់បែបយ៉ាងជាពិសេស ការកសាងហេដ្ឋារចនាសម្ព័ន្ធ តាមមូលដ្ឋាន ដើម្បីធ្វើយ៉ាងណាឲ្យមានភាពងាយស្រួលក្នុងការធ្វើដំណើររបស់បងប្អូនប្រជាពលរដ្ឋ ហើយការដឹកជញ្ចូនកសិផលរបស់ប្រជាកសិករយកទៅលក់នៅលើទីផ្សារបានទាន់ពេលវេលា។ ឯកឧត្តមបន្តថា នេះគឺជាការយកចិត្តទុកដាក់របស់រាជរដ្ឋាភិបាលទៅលើទុក្ខលំបាករបស់បងប្អូនប្រជាពលរដ្ឋ ព្រោះនៅពេលដែលមានផ្លូវធ្វើដំណើរល្អអ្វីៗគ្រប់យ៉ាងក៏មានការប្រែប្រួលដែលរួមទាំងជីវភាពរបស់បងប្អូនប្រជាពលរដ្ឋ។ ឯកឧត្តមបានធ្វើការដាស់តឿនដល់អាជ្ញាធមូលដ្ឋាន និងបងប្អូនប្រជាពលរដ្ឋ សូមជួយថែរក្សាផ្លូវថ្នល់ដែលរាជរដ្ឋាភិបាលតាមរយៈអាជ្ញាធខេត្តបានសាងសង់ជូន ដោយធ្វើយ៉ាងណាឲ្យការប្រើប្រាស់ផ្លូវថ្នល់នៅក្នុងមូលដ្ឋានរបស់ខ្លួនបានយូអង្វែង។ ឯកឧត្តម បានសង្កត់ធ្ងន់ដែលថា ការកសាងផ្លូវមួយខ្សែៗ រដ្ឋត្រូវចំណាយថវិការអស់ជាច្រើន ដូច្នោះនៅពេលដែលការសាងសង់ផ្លូវរួចរាល់ហើយ សូមអាជ្ញាធគ្រប់លំដាប់ថ្នាក់នៅតាមមូលដ្ឋានរួមនិងបងប្អូនប្រជាពលរដ្ឋ ត្រូវតែចូលរួមថែរក្សារផ្លូវនៅក្នុងមូលដ្ឋានរបស់ខ្លួនឲ្យការប្រើប្រាស់បានយូ តាមរយៈការទប់ស្កាត់រថយន្តធំៗដឹកលើសទម្ងន់កុំឲ្យបើកបរលើផ្លូវនេះ ហើយនៅពេលដែលផ្លូវរងការខូចខាតបន្តិចបន្តួចត្រូវធ្វើចលនារកថវិការនៅក្នុងភូមិឃុំ ដើម្បីជូសជុលអោយបានទាន់ពេលវេលា ដោយមិនត្រូវរងចាំថវិការរបស់រដ្ឋនោះទេ និងមិនត្រូវទុកអោយមានការរិះគន់ពីសំណាក់បងប្អូនប្រជាពលរដ្ឋនោះទេ។
លោក ទឹ នាង មេឃុំអង្កាញ់ ស្រុកព្រៃកប្បាស់បានថ្លែងថា ក្នុងនាមបងប្អូនប្រជាពលរដ្ឋលោកពិតជាមានការសប្បាយចិត្តណាស់ដែលឃុំរបស់លោកមានផ្លូវកៅស៊ូសម្រាប់បងប្អូនប្រជាពលរដ្ឋធ្វើដំណើរ ហើយលោកបានប្ដេជ្ញាចិត្តថា អាជ្ញាធឃុំ បងប្អូនប្រជាពលរដ្ឋ និងធ្វើការថែរក្សាផ្លូវនេះ ដើម្បីទុកប្រើប្រាស់អោយបានយូអង្វែងតាមការណែនាំរបស់ឯកឧត្តមអភិបាលខេត្ត៕ គឹមអាន
ប្រភព៖ រដ្ឋបាលខេត្តតាកែវ