នាថ្ងៃព្រហស្បតិ៍ ១១ កើត ខែជេស្ឋ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៣ ខែមិថុនា ឆ្នាំ២០១៩ លោក អន ភារៈ អភិបាលរងខេត្តកោះកុង បានអញ្ជើញស្វាគមន៍ ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធានវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ ក្នុងវគ្គបណ្តុះបណ្តាល ស្តីពីការអភិវឌ្ឍសហគ្រាសធុនតូច និងមធ្យម តាមរយៈការប្រើប្រាស់ច្បាប់កម្មសិទ្ធិបញ្ញា។
លោកអភិបាលរងខេត្ត បានគូសបញ្ជាក់ថា ក្នុងនាមថ្នាក់ដឹកនាំខេត្ត ខ្ញុំសូមវាយតម្លៃថាវគ្គបណ្ដុះបណ្ដាលនេះពិតជាមានសារសំខាន់ណាស់ សម្រាប់ការអភិវឌ្ឍអាជីវកម្មខ្នាតតូច និងមធ្យម នៅក្នុងខេត្ត ឲ្យបងប្អូនពាណិជ្ជករ សេវាករ អាជីវករ មន្ត្រីរាជការ និងសិស្សានុសិស្សទាំងអស់ទទួលបានចំណេះដឹង និងព័ត៌មានទូទៅស្តីពីកម្មសិទ្ធិបញ្ញា ការចុះបញ្ជីម៉ាក ការប្រកួតប្រជែងមិនស្មោះត្រង់ជាដើម ក្នុងគោលដៅជំរុញអាជីវកម្មខ្នាតតូច និងមធ្យមឲ្យកាន់តែល្អប្រសើរឡើង និងមានសមត្ថភាពក្នុងការប្រកួតប្រជែងនៅលើទីផ្សារបន្ថែមទៀត៕ រតនា
ប្រភព៖ រដ្ឋបាលខេត្តកោះកុង