ឯកឧត្តម ផាន់ ចាន់ធុល អភិបាល នៃគណៈអភិបាលខេត្តប៉ៃលិន បានមានប្រសាសន៍ឲ្យដឹងថា៖ កន្លងមករដ្ឋបាលខេត្ត តែងតែយកចិត្តទុកដាក់ផ្សព្វផ្សាយ និងណែនាំដល់អាជីវករដែលបានលើកស្លាកយីហោក្នុងការប្រកបអាជីវកម្មផ្សេងៗ នៅតាមកន្លែងអាជីវកម្មនានា ឲ្យបានត្រឹមត្រូវ និងមានច្បាប់អនុញ្ញាតិពីអាជ្ញាធរដែនដី ស្របតាមច្បាប់របស់រាជរដ្ឋាភិបាលកម្ពុជាកំណត់ ដែលការថ្លែងបែបនេះគឺធ្វើឡើងនៅនាថ្ងៃពុធ ៣កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៥ ខែមិថុនា ឆ្នាំ២០១៩។
ឯកឧត្តមបន្តថា៖ ដើម្បីអនុវត្តច្បាប់អោយមានប្រសិទ្ធភាព រដ្ឋបាលខេត្ត និងកម្លាំងមានសមត្ថកិច្ចពាក់ព័ន្ធត្រូវធ្វើការរុះរើ ស្លាកយីហោ របស់អាជីវករចិនដែលបានលើកស្លាកយីហោខុសបច្ចេកទេសចេញ ហើយអាជ្ញាធរមូលដ្ធានគ្រប់លំដាប់ថ្នាក់ទាំងអស់ត្រូវសហការជាមួយមន្ទីរជំនាញដែលជាប់ពាក់ព័ន្ធធ្វើការណែនាំពីនិតិវិធីនៃការដាក់ស្លាកយីហោឲ្យបានត្រឹម ត្រូវស្របតាមច្បាប់ គឺទី១.ត្រូវដាក់តាំងស្លាកយីហោជាអក្សរខ្មែរនៅខាងលើ។ ២.ត្រូវសរសេរអក្សរបរទេសបន្ទាប់ពីអក្សរខ្មែរនៅផ្នែកខាងក្រោម និងត្រូវមានទំហំអក្សរមួយភាគពីរ (១/២) នៃទំហំអក្សរខ្មែរ។ ទី៣.ប្រសិនបើម្ចាស់អាជីវកម្មទេសចរណ៍មានបំណងប្រើប្រាស់អក្សរបរទេស ទី៣អាចដាក់បាននៅផ្នែកខាងក្រោមបន្ទាប់ទៀតដោយមានទំហំអក្សរមួយភាគពីរ (១/២) នៃទំហំអក្សរខ្មែរដែរ។
សូមបញ្ជាក់ថា៖ ក្នុងឱកាសនោះមន្រ្តីជំនាញពាក់ព័ន្ធ និងកងកំលាំងគ្រប់លំដាប់ថ្នាក់ បានធ្វើការរុះរើស្លាកយីហោអាជីវកម្មជនជាតិចិនចំនួន០២ទីតាំង ដែលទីតាំងទី១.គឺជាភោជនីយដ្ឋានចិនឈ្មោះថា ឌឺហ្គជររហ្វវល និងទីតាំងទី២.គឺជា superrich the best casino ស្ថិតនៅភូមិផ្សាព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន៕ រតនា
ប្រភព៖ រដ្ឋបាលខេត្តប៉ៃលិន