នាព្រឹកថ្ងៃព្រហស្បតិ៍ ៤កើត ខែជេស្ឋ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៦ ខែមិថុនា ឆ្នាំ២០១៩ នៅសាលប្រជុំសាលាខេត្តរតនគិរី មានរៀបចំកិច្ចប្រជុំគណៈបញ្ជាការឯកភាពខេត្ត ដែលកិច្ចប្រជុំនេះធ្វើឡើងក្រោមងធិបតីភាព ឯកឧត្តម ថង សាវុន អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត និងមានការចូលរួមពីលោក លោកស្រី អភិបាលរងខេត្ត មេបញ្ជាការ មេបញ្ជាការរងកងកម្លាំងប្រដាប់អាវុធទាំងបី អភិបាលក្រុង ស្រុក ប្រធានមន្ទីរ អង្គភាពពាក់ព័ន្ធក្នុងខេត្ត។

      កិច្ចប្រជុំនេះធ្វើឡើងដើម្បី ពិនិត្យ វាយតម្លៃលើសភាពការណ៍ សន្តិសុខ សណ្តាប់ធ្នាប់សាធារណៈ សន្តិសុខសង្គម ដែលកើតមានកន្លងមកនៅក្នុងខេត្ត ផ្សព្វផ្សាយសភាពការណ៍វិវត្តន៍ថ្មីៗ និងដាក់ចេញនូវវិធានការចាំបាច់មួយចំនួនសម្រាប់អនុវត្តខាងមុខ។

      ឯកឧត្តម ថង សាវុន អភិបាលខេត្តរតនគិរី បានថ្លែងនូវការកោតសរសើរចំពោះកងកម្លាំងប្រដាប់អាវុធ មន្ត្រីរាជការ ក្នុងខេត្តទាំងអស់ ដែលបានអនុវត្តបានល្អក្នុងការទទួលខុសត្រូវលើតួនាទី ភារកិច្ចរបស់ខ្លួន ក្នុងការរក្សាសន្តិសុខ សណ្តាប់ធ្នាប់ ការផ្តល់សេវាសាធារណៈនានាជូនប្រជាពលរដ្ឋ ស្របតាមគោលការណ៍របស់រាជរដ្ឋាភិបាល។

      ឯកឧត្តម បានជំរុញឲ្យគណៈបញ្ជាការការឯកភាពក្រុង ស្រុក កងកម្លាំងប្រដាប់អាវុធ អង្គភាពពាក់ព័ន្ធ ត្រូវពង្រឹងនូវវិន័យ បង្កើនភាពម្ចាស់ការក្នុងការគ្រប់គ្រងឆ្លើយតបសភាពការណ៍ណាមួយ ពង្រឹងការឯកភាពផ្ទៃក្នុង ម្ចាស់ការដោះស្រាយឲ្យបានទាន់ពេលវេលានៅរាល់បញ្ហាដែលកើតមាននៅមូលដ្ឋាន ពង្រឹងការគ្រប់គ្រងបញ្ហាការទាមទារ ឬតវ៉ានានា ឆ្លើយតបបានទាន់ពេលវេលានូវតាមមតិសាធារណៈដែលបានលើកឡើង ព្រមជាមួយគ្នានេះ មន្ត្រីរាជការ កងកម្លាំងត្រូវពង្រឹងលើការអនុវត្តតួនាទីបន្ថែមទៀត ដោយកែប្រែនូវឥរិយាបថការផ្តល់សេវាសាធារណៈឲ្យបានល្អប្រសើរ៕ រតនា

ប្រភព៖ រដ្ឋបាលខេត្តរតនគិរី