លោក សុខ សុទ្ធី អភិបាលរងខេត្តកោះកុង បានដឹកនាំកិច្ចប្រជុំក្រុមការងារសិក្សាការកាត់ឆ្វៀលដីចេញពីដែនជម្រកសត្វព្រៃតាតៃ ជូនប្រជាពលរដ្ឋដែលរស់នៅ កាន់កាប់ និងអាស្រ័យផលជាក់ស្តែង នៅស្រុកកោះកុង នាថ្ងៃចន្ទ ១ កើត ខែជេស្ឋ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៣ ខែមិថុនា ឆ្នាំ២០១៩។
កិច្ចប្រជុំនេះមានគោលបំណងកំណត់ឲ្យបានច្បាស់លាស់ និងមានមូលដ្ឋានសម្រាប់ការស្នើសុំកាត់ឆ្វៀលដីជូនប្រជាពលរដ្ឋនៅស្រុកកោះកុង ដែលរស់នៅ កាន់កាប់ និងអាស្រ័យផលជាក់ស្តែង (មានដំណាំ ឬធ្លាប់ជាដីស្រែ ជាដើម) និងកាត់បន្ថយការស្នើសុំកាត់ឆ្វៀលនៅតាមដងផ្លូវជាតិលេខ ៤៨ ឲ្យបានខ្ពស់បំផុត ដើម្បីរក្សាឲ្យបាននូវទេសភាពដងព្រៃប្រឹក្សា ដូចប្រយោគមួយឃ្លាដែលបានលើកឡើងដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះជាណាចក្រកម្ពុជា «ចង់មើលប្រាសាទទៅលេងខេត្តសៀមរាប ចង់មើលព្រៃប្រឹក្សាមកលេងខេត្តកោះកុង»៕ រតនា
ប្រភព៖ រដ្ឋបាលខេត្តកោះកុង
