រដ្ឋបាលខេត្តសៀមរាប បានបើកកិច្ចប្រជុំ ស្ដីពីគម្រោងចុះរុះរើ និងកាត់ផ្ទាំងផ្សព្វផ្សាយពាណិជ្ជកម្មគ្រប់ប្រភេទដែលគ្មានច្បាប់ និងលើសទំហំកំណត់ នៅក្នុងខេត្តសៀមរាប ដឹកនាំដោយ លោក នាក់ ណេរ៉ុន អភិបាលរងខេត្ត លោក នាយករងរដ្ឋបាលខេត្ត លោកនាយកទីចាត់ការចំណុះសាលាខេត្ត និងមានការចូលរួមពី លោក លោកស្រី អភិបាល អភិបាលរង ក្រុង ស្រុក អង្គភាពអគ្គិសនី តំណាងក្រុមហ៊ុន និងអ្នកពាក់ព័ន្ធនានា ជាច្រើនទៀត នាថ្ងៃពុធ ១១រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៩ ខែឧសភា ឆ្នាំ២០១៩។
គោលបំណងនៃកិច្ចប្រជុំនេះ គឺដើម្បីរៀបចំសោភ័ណ្ឌភាព សណ្ដាប់ធ្នាប់ របៀបរៀបរយសាធារណៈក្នុងខេត្តសៀមរាប ឲ្យសក្តិសមជាខេត្តទេសចរណ៍ប្រវត្តិសាស្ត្រដ៏រុងរឿង ក៏ដូចជាការរក្សានូវអត្តសញ្ញាណ នៃវប្បធម៌ទំនៀមទម្លាប់ប្រពៃណី និងលើកតម្កើងកិត្យានុភាពវប្បធម៌ អក្សរសាស្ត្រ ជាតិខ្មែរ។
គម្រោងនេះ នឹងចាប់ផ្តើមអនុវត្ត ចាប់ពីថ្ងៃទី០៣ ខែមិថុនា ឆ្នាំ២០១៩ ខាងមុខនេះ ដោយចាប់ផ្តើមពីក្នុងក្រុងសៀមរាប ពីចំណុចគល់ស្ពានព្រះរាជដំណាក់ទៅខាងកើត បន្ទាប់មកបន្តអនុវត្តន៍រហូតត្រូវបានបញ្ចប់ទូទាំងក្រុង និងបន្តដល់ស្រុកទាំង១១ថែមទៀត ដែលចំណុះខេត្តសៀមរាបទាំងមូល ដោយឡែកកាលបរិច្ឆេទ នឹងជូនដំណឹងតាមក្រោយ៕ រតនា
ប្រភព៖ រដ្ឋបាលខេត្តសៀមរាប