(កំពង់ឆ្នាំង)៖ ថ្លែងនៅក្នុងពេលបើកយុទ្ធនាការ ស្តីពីការពាក់មួកសុវត្ថិភាពនៅ ស្រុកបរិបូណ៌ ខេត្តកំពង់ឆ្នាំង នៅព្រឹកថ្ងៃសុក្រ ៤រោច ខែមិគសិរ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៨ ខែធ្នូ គ.ស២០១៧ នេះ ឯកឧត្តមចេង ញ៉ាន់ អភិបាលរងខេត្តកំពង់ឆ្នាំងបានអំពាវនាវដល់ប្រជាពលរដ្ឋដែលជាម្ចាស់ទោចក្រយានយន្ត និង រថយន្តអោយចូលរួមគោរពច្បាប់ចរាចរណ៍ទាំងអស់គ្នាក្នុងពេលធ្វើដំណើរនៅលើដងផ្លូវ ដោយបង្កើនការប្រុងប្រយ័ត្នខ្ពស់ដើម្បីកាត់បន្ថយករណីគ្រោះថ្នាក់ចរាចរណ៍អោយនៅកំរិតទាបបំផុត ។ ការអំពាវនាវរបស់អាជ្ញាធរខេត្តនាពេលនេះ ខណៈដែលអត្រានៃគ្រោះថ្នាក់ចរាចរណ៍ នៅតែបន្តកើតឡើងនៅគ្រប់ទិសទីទូទាំងប្រទេស បន្តកើតមានគួរអោយព្រួយបារម្ភ ហើយបណ្តាលអោយមានអ្នកស្លាប់ របួសជាបន្តបន្ទាប់ និង ខូចខាតទ្រព្យសម្បត្តិមួយចំនួនធំ ។ ឯកឧត្តមបានបញ្ជាក់ទៀតថា យុទ្ធនាការដែលធ្វើឡើងនាពេលនេះគឺ ដើម្បីបំផុសអោយមានការចូលរួមពីប្រជាពលរដ្ឋ ចូលរួមគោរពច្បាប់ចរាចរណ៍ទាំងអស់គ្នា និង ដើម្បីអោយប្រជាពលរដ្ឋយល់ដឹង អំពីសារៈប្រយោជន៍នៃការពាក់មួកសុវត្ថិភាពក្នុងពេលធ្វើដំណើរ ដែលមួកសុវត្ថិភាពជួយការពារជីវិតយើង ក្នុងពេលមានគ្រោះថ្នាក់ចរាចរណ៍ និង សារៈសំខាន់មួយទៀតបានចូលរួមគោរពច្បាប់ចរាចរណ៍។ ដោយឡែកអ្នកបើកបរថយន្ត ត្រូវតែពាក់ខ្សែក្រវ៉ាត់ជាប្រចាំក្នុងពេលបើកបរ មិនត្រូវបើកបរក្រោមឥទ្ធិពលនៃជាតិស្រវឹង និងប្រើប្រាស់គ្រឿងញៀន ការបើកបរហួសល្បឿនកំណត់ ការវ៉ាឬជែង ក្នុងស្ថានភាពគ្រោះថ្នាក់ ។ ឯកឧត្តមបានបញ្ជាក់ទៀតថា អត្រាគ្រោះថ្នាក់ចរាចរណ៍លើផ្លូវបន្តកើតឡើងគួអោយកត់សម្គាល់ ហើយក្នុងនោះមាន៧៧ភាគរយគឺជាទោចក្រយានយន្ត ហើយក្នុងចំណោមនេះគឺមាន៦៧ភាគរយ ជាអ្នកដែលបើកបរដោយមិនពាក់មួកសុវត្ថិភាព ។ ឯកឧត្តមកែវ ពៅទីប្រឹក្សាសម្តេចក្រឡាហោមសងខេង និង ជាប្រធានមន្ទីរសារធារណការនិងដឹកជញ្ជូនខេត្តកំពង់ឆ្នាំង បានអោយដឹងថា សម្រាប់យុទ្ធនាការពាក់មួកសុវត្ថិនាពេលនេះ បានបំពាក់មួកសុវត្ថិភាពដល់ប្រជាពលរដ្ឋដែលមិនបានពាក់មួកសុវត្ថិភាពក្នុងពេលធ្វើដំណើរបានជាច្រើន ។ ក្រៅពីពាក់មួកសុវត្ថិភាព មន្រ្តីជំនាញនៃមន្ទីរសាធារណការ និងដឹកជញ្ជូន បានចែកជូននូវសៀវភៅច្បាប់ ចរាចរណ៍ផ្លូវគោក ខិតប័ណ្ណអប់រំស្តីពីចរាចរណ៍ និងបិទចំណាំងផ្លាតដល់យានយន្តនិងទោចក្រយាន្តជាច្រើនផងដែរ ។ ហើយយុទ្ធនាការនេះនឹងធ្វើជាបន្តបន្ទាប់ទាំងនៅក្នុងក្រុងកំពង់ឆ្នាំង និង នៅស្រុកមួយចំនួនទៀតតាមបណ្តោយផ្លូវជាតិលេខ៥ផងដែរ ។ ប្រភពព័ត៌មាន: រដ្ឋបាលខេត្តកំពង់ឆ្នាំង (ថ្ងៃទី០៨ ខែធ្នូ ឆ្នាំ២០១៧)