នាព្រឹកថ្ងៃពុធ ១១រោជ ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៩ ខែឧសភា ឆ្នាំ២០១៩ លោក គង់ វិតាណ: អភិបាលរង ខេត្តព្រះសីហនុ ដឹកនាំកិច្វប្រជុំត្រួត ពិនិត្យ គ្រប់គ្រងផ្សព្វផ្សាយផ្លាកសញ្ញាពាណិជ្ជកម្ម និងទីតាំងតម្លើងបង្គោលវ៉ាណូក្នុងខេត្តព្រះសីហនុដោយមានការចូលរួមដោយមន្រ្តីមន្ទីរជំនាញក្នុងខេត្ត ។
លោក គង់ វិតាណ: បានបញ្ជាក់ថា តាមចរាចរណ៍ជូនដំណឹងរបស់ ក្រសួងវប្បធម៌ និងវិចិត្រសិល្បៈ រាល់ការសរសេរអក្សរលើផ្ទាំងយី ហោ ផ្ទាំងផ្សាយពាណិជ្ជកម្ម ផ្ទាំងសញ្ញាផ្សេងៗ ត្រូវគោរពតាមគោល ការណ៍ ដោយប្រើអក្សរជាតិ តែបើមានអក្សរបរទេស ត្រូវមានអក្សរ ជាតិនៅជួរខាងលើ ទំហំធំជាងអក្សរបរទេសពីរដង ។ ដោយឡែកចំពោះអក្ខរាវិរុទ្ធត្រូវគោរពតាមក្បួនខ្នាត វេយ្យាករណ៍ និងវចនានុក្រមខ្មែរ របស់សម្ដេចព្រះសង្ឃរាជព្រះមហាសុមេ ធាអិបតីជោតញ្ញាណោ ជួន ណាត ។ ដោយសារតែកន្លងមក មានស្លាកយីហោ និងផ្ទៀងផ្សព្វ ផ្សាយពាណិជ្ជកម្មមួយចំនួន ដែលមិនបានអនុវត្តតាមការជូនដំណឹងរបស់រដ្ឋបាលខេត្ត ទើបក្រុមការងាររបស់ខេត្ត ចុះធ្វើការអប់រំ ផ្សព្វ ផ្សាយបន្តដល់ម្ចាស់ស្លាកយីហោ ឱ្យចូលរួមគោរពតាមច្បាប់កម្ពុជា ។ ដោយឡែកស្លាកយីហោណាដែលមិនគោរពតាមការណែនាំ ក្រុមការ ងារ និងធ្វើការរុះរើទម្លាក់ចុះ ដើម្បីចូលរួមថែរក្សាអភិរក្សអក្ដរសាស្រ្តជាតិ ប្រកបដោយសោភ័ណភាព បរិស្ថានទីក្រុងទេសចរណ៍នាទិស និរតី ។
លោកបានបន្តថា ក្រុមការងារចុះណែនាំ និងជំរុញដល់ចាស់ស្លាក យីហោ បង្គោលប៉ាន់ណូ របារកាត់ ទទឹងផ្លូវ និងផ្ទាំងរូបភាពផ្សព្វផ្សាយពាណិជ្ជកម្មផ្សេងៗមកសុំច្បាប់អនុ ញ្ញាត ដាក់តាំងការផ្សព្វផ្សាយពាណិជ្ជកម្មជាសាធារណៈ ។ ជំរុញតាមដាន និងគ្រប់គ្រងការប្រមូលចំណូលពីទីតាំង និងសេវាផ្សព្វ ផ្សាយពីស្លាកយីហោ បង្គោលប៉ាណូរបារកាត់ទទឹងផ្លូវ និងផ្ទាំងរូបភាពផ្សព្វផ្សាយពាណិជ្ជកម្មផ្សេងៗ ឱ្យមានប្រសិទ្ធិភាព តម្លាភាព ៕ មុនីរម្យ
ប្រភព៖ រដ្ឋបាលខេត្តព្រះសីហនុ