លោក ពិន ប្រាកដ អភិបាលរងខេត្តសៀមរាប និងជាតំណាង ឯកឧត្តម ទៀ សីហា  អភិបាល នៃគណៈអភិបាលខេត្តសៀមរាប បានជួបពិភាក្សាការងារ សំណេះសំណាល ធ្វើបទបង្ហាញពីការងារអភិវឌ្ឍន៍លើវិស័យទេសចរណ៍ ជាមួយគណៈប្រតិភូ ខេត្តជុងចុងណាំដូ នៃសាធារណរដ្ឋកូរ៉េខាងត្បូង ដឹកនាំដោយលោក Na Sa-yeol អភិបាលរងខេត្តជុងចុងណាំដូ និងមានការចូលរួមពី លោកនាយករងរដ្ឋបាលខេត្ត លោកនាយកទីចាត់ការចំណុះសាលាខេត្ត  លោកប្រធាន អនុប្រធាន មន្ទីរ-អង្គភាពពាក់ព័ន្ធ ជុំវិញខេត្ត និងសហការីអមដំណើរគណៈប្រតិភូ សរុបចំនួន៤០នាក់ នៅរសៀលអង្គារ៍ ១០រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៨ ខែឧសភា ឆ្នាំ២០១៩។

      ជំនួបពិភាក្សារការងារនេះ ធ្វើឡើងក្នុងគោលបំណងដើម្បីផ្លាស់ប្តូរបទ ពិសោធន៍ ទៅវិញទៅមក សម្រាប់ជាមូលដ្ឋានគ្រឹះ ក្នុងកិច្ចអភិវឌ្ឍន៍លើវិស័យទេសចរណ៍ ឲ្យកាន់តែមានការរីកចម្រើន ព្រមទាំងដើម្បីពង្រឹងចំណងសម្ព័ន្ធមេត្រីភាពឲ្យកាន់តែរឹងមាំរវាងខេត្តទាំងពីរ។

      លោកអភិបាលរងខេត្ត ក៏បានថ្លែងអំណរគុណដល់គណៈប្រតិភូ ក៏ដូចជាប្រជាជនកូរ៉េ ដែលតែងតែជួយកម្ពុជាលើគ្រប់វិស័យ និងបានជូនពរសូមឲ្យដំណើរមាតុភូមិនិវត្តន៍របស់គណៈប្រតិភូ ទទួលបាននូវសុខសុវត្តិភាព និងជោគជ័យគ្រប់ភារកិច្ច។

      ដោយឡែកលោកប្រធាន គណៈប្រតិភូ ក៏បានធ្វើការកោតសរសើរលើការអភិវឌ្ឍន៍ ការរីកចម្រើនយ៉ាងឆាប់រហ័សរបស់ខេត្តសៀមរាប ហើយលោកសន្យានឹងបន្តធ្វើកិច្ចសហការល្អរវាងគ្នា ក្នុងកិច្ចសហប្រតិបត្តិការឲ្យកាន់តែខ្លាំងក្លា និងស៊ីជម្រៅ លើគ្រប់វិស័យ ទាំងនយោបាយ សេដ្ឋកិច្ច សុខាភិបាល អប់រំ និងកីឡា ដើមី្បធ្វើការអភិវឌ្ឍន៍លើកស្ទួយដល់សេដ្ឋកិច្ចប្រទេស ជាតិ និងសេដ្ឋកិច្ច ប្រជាជននៃខេត្តទាំងពីរផងដែរ៕ រតនា

ប្រភព៖ រដ្ឋបាលខេត្តសៀមរាប