ថ្ងៃអង្គារ ១០ រោច ខែពិសាខ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៨ ខែឧសភា ឆ្នាំ២០១៩ លោកជំទាវអភិបាលខេត្តកោះកុង បានគូសបញ្ជាក់ផងដែរថា កន្លងមកខេត្តកោះកុង ទទួលបានក្រុមហ៊ុនជាច្រើនចូលមកដាក់ទុនវិនិយោគ ហើយខេត្តមានធនធានធម្មជាតិដ៏សម្បូរបែប ពិតជាមានសក្តានុពលអាចបម្រើវិស័យសេដ្ឋកិច្ច និងទេសចរណ៍។ ការបង្កើតទំនាក់ទំនងមិត្តភាព និងកិច្ចសហសប្រតិបត្តិការ រវាងខេត្តជីលីន នៃសាធារណរដ្ឋប្រជាមានិតចិន និងខេត្តកោះកុង នៃព្រះរាជាណាចក្រកម្ពុជា បានឈានដល់ការចងសម្ព័ន្ធមេត្រីភាពខេត្តបងប្អូន កោះកុង-ជីលីន លើកិច្ចសហប្រតិបត្តិការរវាងខេត្តទាំងពីរ ដែលនឹងនាំមកនូវការរីកចម្រើនផ្នែកសេដ្ឋកិច្ច និងទេសចរណ៍ ស្របតាមគោលបំណងរបស់ប្រទេសទាំងពីរ។ ជាពិសេសថ្ងៃនេះ បានចុះកិច្ចព្រមព្រៀងប្រតិបត្តិការ រវាងមន្ទីរទេសចរណ៍ខេត្តកោះកុង ជាមួយមន្ទីរវប្បធម៍ និងទេសចរណ៍ខេត្តជីលីន ដើម្បីបង្កើនចំណេះដឹងផ្នែកធនធានមនុស្សលើវិស័យទេសចរណ៍ឱ្យរីកចម្រើន ក្នុងគោលដៅផ្លាស់ប្តូរមុខមាត់ខេត្តកោះកុង ឱ្យក្លាយទៅជាខេត្តទេសចរណ៍ដ៏សំខាន់មួយរបស់ប្រទេសកម្ពុជា៕ មុនីរម្យ
ប្រភព៖ រដ្ឋបាលខេត្តកោះកុង
